Qazir arnaiy tehnikanyń kómegimen trotýarlar men joldardy tazalaý jumystary júrgizilýde. Abattandyrýǵa jaýapty qyzmetkerler kún saiyn qalany qoqystan tazalaýǵa shyǵady. Arnaiy tehnikanyń kómegimen de, qolmen de jiektastar tazartylady. Sondai-aq, kommýnaldyq kúshter erigen qar sýyn tehnikanyń kómegimen soryp alý jumysyna da jumyldyrylady.
Mysaly, qazirgi ýaqytta Almaty aýdany boiynsha osy jumystarǵa 400-den astam jol jumysshy men 170 arnaiy tehnika jumyldyrylǵan. Elordanyń barlyq aýdanynda sanitarlyq tazalaý jumystary júrgizilýde.
Qalany kógaldandyrý jumystary biyl da jalǵasady. Eske sala keteiik, ótken jyly elordada 1 millionǵa jýyq jasyl jelek otyrǵyzylǵan. Endi Almaty aýdanynda R.Qoshqarbaev dańǵylynda (Táýelsizdik dańǵylynan S.Nurmaǵambetov kóshesine deiin), B. Momyshuly dańǵylynda (Táýelsizdik dańǵylynan Q.Sátbaev kóshesine deiin), Nájimedenov kóshesinde, A. Baitursynov kóshesinde, Qoshqarbaev dańǵylynda, Qordai kóshesinde, «Vstrecha» SÚ aýmaǵynda jáne t.b. jalpy sany 6 myńnan astam aǵash otyrǵyzý josparlanyp otyr. Sonymen qatar, óteme retinde kóktemgi kezeńde T.Júrgenov jáne K.Ázirbaev kóshelerin kógaldandyrý úshin aǵashtar otyrǵyzý josparlanýda.
Aldaǵy kóktemgi jalpyqalalyq senbilik aiasynda qalanyń barlyq aýdany kvartaldar men sektorlarǵa bólingen. Onda ákimdikterdiń jaýapty qyzmetkerleri bekitilgen. Turǵyndardy PIK jáne MIB-pen birlesip, sondai-aq biznes pen mekeme ókilderin jalpy qalalyq senbilikterge qatysýǵa shaqyramyz.
