Elordada qala turǵyndarynyń bos ýaqytyn jaily ótkizýi úshin kezekti bir jaiaý júrginshiler joly abattandyryldy. Endi Baraev kóshesi (Respýblika dańǵylynan Sh.Ýálihanov kóshesine deiin) kartadaǵy qarapaiym kqshelerdiń biri ǵana emes, jańa qoǵamdyq keńistikke ainaldy.
– Jaiaý júrginshiler promenadynda balalarǵa arnalǵan oiyn alańdary, átkenshekter, óz ónerin kórsetý úshin improvizatsiialanǵan kórinisterge, elektr avtokólikterin zariadtaýǵa arnalǵan arnaiy oryndar bar. Jaiaý júrginshiler ótkelinde qala turǵyndary arasynda múmkindigi shekteýli jandardyń júrip-turýyna kedergi keltirmeitin orta salynyp, trotýarlar keńeitilgen. Sol siiaqty qoǵamdyq keńistiktiń aýmaǵyn kógaldandyryp jatyrmyz. Aldaǵy ýaqytta qoǵamdyq keńistikti odan ári damytyp, abattandyrý boiynsha tiisti jumystar atqarylatyn bolaldy, – dedi elorda ákimi Altai Kólginov.
Ákim jaiaý júrginshiler promenadyn ashý jónindegi ideia ornalasqan jerine, qala turǵyndarynyń kóptep júrýine, tiisinshe demalatyn orynnyń bolmaýyna bailanysty paida bolǵanyn atap ótti.
Qoǵamdyq keńistik tujyrymdamasyn ýrbanistika ortalyǵy men aýdan ákimdigi turǵyndarmen birlesip talqylaǵanyn aita ketýimiz kerek.
Jyl basynda «Nur-Sultan – jaily qala» master-jospary aiasynda biyl 200-den astam aýla men qoǵamdyq keńistik abattandyrý josparlanǵan edi. Qazirgi tańda 100-ge jýyǵy qoǵamdyq keńistik ashylyp, qala turǵyndary men qonaqtarynyń igiligine berilgenin aita ketýimiz kerek.
– Búginjańa amfiteatr (Esil ózeni men Beibitshilik jáne kelisim saraiy arasyndaǵy saiabaqta ornalasqan) ashylady. Amfiteatr sahnasynda «Astana Opera» teatrynyń ártisteri óner kórsetti. Kaskadty amfiteatr saiabaqty úilesimdi túrde jalǵap, qala turǵyndarynyń demalatyn ári shyǵarmashyl jandardyń talantyn pash etetin orynǵa ainalatyna senimdimin, – dedi elorda ákimi.
