Sáikesinshe qala biligi turǵyndardyń páter máselesin sheshýde aýqymdy sharalar legin qolǵa alǵan. Ótken jyly elordada jalpy kólemi 3 million sharshy metr bolatyn turǵyn úi salynyp, el igiligine berdi.
Sondai-aq, áleýmettik páter berý kórsetkishi de eselep ulǵaidy. Máselen 2019 jyly shaharda 2900 áleýmettik páter paidalanýǵa berilse, biyl bul kórsetkish 10 myńǵa deiin artty.
Munan bólek Qazaqstan Respýblikasynyń Tuńǵysh Prezidenti – Elbasy Nursultan Nazarbaevtyń tapsyrmasyna sai, jumys isteitin jastarǵa satyp alý quqyǵynsyz jalǵa páterler berý týraly tapsyrmasy da kóp túiitkildiń túiinin tarqatýǵa muryndyq boldy.
2019 jyly Nur-Sultan qalasynyń ákimdigi Elbasy tapsyrmasyn tolyqtai oryndap, jumysshy jastarǵa 1050 páterdiń kiltin tabystady. Ótken jyly álemdik pandemiiaǵa bailanysty bul baǵytta bólingen qarajat mólsheri qysqaryp, jastarǵa 350 páter berý týraly sheshim qabyldanǵan-dy. Jumysshy jastarǵa páterler Nur-Sultan qalasyndaǵy R.Qoshqarbaev dańǵyly, Qordai jáne № 23-31 kósh. qiylysyndaǵy aýdan, Abylai han dańǵyly men B.Momyshuly jáne R.Qoshqarbaev dańǵyldarynyń qiylysy mekenjailaryndaǵy turǵyn úilerden berildi.
Endigi kezekte olar osynda 5 jyl turyp, óz páterlerin alýǵa qajetti bastapqy jarnany jinaidy. Talaidyń baspanaly bolýyna qol ushyn sozatyn jobaǵa jasy 29-dan aspaǵan, jumys isteitin jastar qatysa alady. Eń bastysy olardyń menshiginde eshqandai turǵyn úi bolmaýy kerek. Esesine «Otbasy bankinde» depozittik shotynyń bolýy quptalady. Sonymen qatar sońǵy 6 aida keminde 111 myń 120 teńge tabysy bolǵany jón. 2020 jylǵy 1-6 jeltoqsan aralyǵynda Nur-Sultan qalasynyń jumys isteitin jastary úshin satyp alý quqyǵynsyz jalǵa beriletin baspanaǵa ótinimder qabyldandy. Jobaǵa jalpy 5463 jas qatysqan. Solardyń arasynda aiy ońynan týyp, jaldamaly páter ielengenderdiń biri – elordalyq pedagog Maǵjan Dánebekov.
– Aqpan aiynda Abylai han dańǵylyndaǵy №56A turǵyn úiden 1 bólmeli páterdi jalǵa aldym. Jaldaý aqysy qaladaǵy jaldamaly páter naryǵymen salystyrǵanda birneshe ese arzan. Men osy páterde turyp, ipotekalyq baǵdarlamalarǵa qatysý úshin alǵashqy jarnany jinaý múmkindigine ie boldym. Kórshilerimniń barlyǵy da – osyndai áleýmettik baǵdarlama qatysýshylary. Osy qalada 15 jyldan beri turyp kelemin. Otbasymen páter jaldap kúneltýdiń qiyndyǵy maǵan málim. Sondyqtan da jumys isteitin jastarǵa satyp alý quqyǵynsyz jalǵa páterler berý jobasyn baspanamen qamtýdaǵy baiandy ekenin senimmen aita alamyn, – deidi Maǵjan Jandosuly.
Al qala ákimdigi biyl jumys isteitin jastarǵa satyp alý quqyǵynsyz 1050 páter jalǵa beriletinin málimdedi. Bul degenińiz, osynshama jastyń baspana máselesin sheshýge naqty qadam jasalǵanyn kórsetedi.
https://www.youtube.com/watch?v=eDstrJ8HIGY
