Elordada «Zań jáne tártip» qaǵidaty boiynsha prokýratýra men Politsiia departamentiniń úilestirýimen ótip jatqan esirtki qylmysyna qarsy ailyq barysynda birneshe adam qolǵa tústi, dep habarlaidy Dalanews.kz.
Respýblikalyq «Qarasora» jedel-aldyn alý operatsiiasy kezinde 27 jastaǵy astanalyq ustalǵan.
- Tergeý barysynda onyń jalǵa alǵan páterin esirtki saqtaityn qoimaǵa ainaldyrǵany belgili boldy. Tintý kezinde politseiler 300-den astam oralǵan paket, aq tústi untaq tárizdi zattar salynǵan plastik ydystar jáne elektrondy tarazylardy tárkiledi. Kúdikti uiymdasqan esirtki saýdasynyń bir bóligi bolǵany anyqtaldy: ol qoimashy rólin atqaryp, esirtki partiialaryn saqtaǵan. Tyiym salynǵan zattar internet-resýrstar arqyly arnaiy «operatordyń» nusqaýymen taratylyp otyrǵan. Qyzmeti úshin kúdikti elektrondy tólemdermen aqy alyp kelgen. Qazir oǵan qatysty qylmystyq is qozǵalyp, basqa da qatysy bar tulǵalardy anyqtaý jumystary jalǵasyp jatyr, - delingen habarlamada.
Sondai-aq politsiia 49 jastaǵy sheteldik azamatty ustady. Ol Astanada uzaq ýaqyt turyp kelgen ári yqtiiarhaty bar. Tintý kezinde 80-nen astam oralǵan paket tabylyp, saraptama olardyń sintetikalyq esirtki ekenin rastady. Jalpy salmaǵy 80 gramnan asqan. Qazirgi ýaqytta kúdiktige esirtkini saqtaý, satý jáne qoldaný faktileri boiynsha is qozǵalyp, qamaýǵa alyndy.
Elorda politseileri esirtkiniń zańsyz ainalymyna qatań qylmystyq jaýapkershilik qarastyrylǵanyn eske salyp, turǵyndardy tyiym salynǵan zattardyń taralýy týraly málimetti birden 102 nómirine habarlaýǵa shaqyrdy.
Aita keteiik, elordada 30 kúndik keshendi profilaktikalyq is-sharalar bastalǵan bolatyn. Onyń aiasynda birlesken reidter, oqý oryndarynda túsindirý jumystary, sondai-aq esirtki taratatyn internet-saittardy anyqtaý jáne buǵattaý sharalary júrgizilýde.
