Astanada «Taza Qazaqstan. Astana – tazalyq pen tártiptiń úlgisi» atty aýqymdy ekologıalyq aksıasy jalǵasýda. Búgin S. Seıfýllın atyndaǵy Qazaq agrotehnıkalyq ýnıversıtetiniń 5000-nan astam stýdenti aýqymdy ekoaksıany qoldap, qalany tazalaýǵa shyqty, dep habarlaıdy elorda ákimdiginiń resmı saıty.

«Qorshaǵan ortany tazartý máselesin sheshý bárimiz úshin paıdaly, óıtkeni taza aýa azamattardyń densaýlyǵy men ál-aýqatyn jaqsartady. Qazirgi ýaqytta jas urpaqtyń senbilikterge qatysýy qalalardy ómir men jumys úshin tartymdy etetin damýdyń negizi bolýy kerek. Bıyl 130 jyldyǵy atalatyn kórnekti memleket qaıratkeri Sáken Seıfýllınniń esimimen atalatyn ýnıversıtet stýdentteri Seıfýllın atyndaǵy kósheni abattandyrýǵa óz úlesterin qosýy zańdy», - dedi QazATÝ rektory Qanat Tireýov.

Aıta keteıik, is-shara ýnıversıtet stýdentteri qatysqan chellendjden bastaldy. Máselen, S.Seıfýllın atyndaǵy Qazaq agrotehnıkalyq zertteý ýnıversıtetiniń stýdentteri estafetany L. N. Gýmılev atyndaǵy Eýrazıa ulttyq ýnıversıtetine joldady.

Uıymdastyrýshylar atap ótkendeı, ekochellendj jalǵasady jáne Astananyń 15 joǵary oqý ornynyń barlyq stýdentterin qamtıdy.

«Búgin biz «Taza Qazaqstan» respýblıkalyq aksıasy aıasynda is-shara ótkizdik jáne barshańyzdy qalamyzdyń tazalyǵyn saqtaýǵa shaqyrǵymyz keledi, óıtkeni bizdiń densaýlyǵymyz osyǵan baılanysty. Biz elimizdi tartymdy etý úshin Memleket basshysyn qoldaımyz. Búgin biz ýnıversıtet aýmaǵyn jáne oǵan jaqyn mańdaǵy saıabaqtardy tazarttyq, sondaı-aq Beıbitshilik, Álıa Moldaǵulova jáne Jeńis dańǵyldaryn tazarttyq. Biz ózimizben birge tyrnaýysh, kúrek jáne sypyrǵysh sıaqty qajet nárseniń bárin aldyq. Búgingi aksıany JOO-nyń kóptegen stýdentteri qoldaǵanyn atap ótkim keledi», - dedi 3 kýrs stýdenti Sanjar Bazarbekov.

Sonymen qatar ol eger árkim ózinen bastasa, elordada tazalyq pen tártipti saqtasa, qala odan da ádemi bolyp, kóbirek týrıserdi tartatynyn atap ótti.

Aıta ketsek, Astanada aýqymdy ekoaksıa jalǵasýda. Ol bes aptaǵa sozylady, olardyń árqaısysy belgili bir taqyrypqa arnalǵan. Osy apta «Kıeli meken» degen atpen ótýde.

«Jasyl aımaq» úshinshi aptasy aǵash otyrǵyzýǵa, ekpelerdi aqtaýǵa arnalady.

4 mamyrǵa deıingi kezeń – «Ónegeli urpaq», ol ardagerler turatyn aýlalardy jáne qarttar úıleriniń aýmaqtaryn tazalaýǵa jáne abattandyrýǵa arnalady.

Sońǵy, besinshi aptada «Móldir bulaq» dep atalatyn sý aıdyndary – ózender men kólderdiń aınalasy qoqystan tazartylady.