– Búgin «Stop Covid» aksıasy ótip jatyr. El bolyp koronavırýs ınfeksıasyna qarsy turý úshin jaqsy ımýnıtet bolý kerek. Ony qalyptastyrýdyń birden-bir joly – vaksına. Osy oraıda bizge qoldaý bildirip otyrǵan 15 JOO bar. Bárimiz biletindeı, qyrkúıek aıynda oqý offlaın formatta bastalady. Al JOO talaptaryna sáıkes stýdentter offlaın formatta oqýy úshin vaksına alýy qajet. Vaksına alý men almaý adamnyń óz sheshimi. Oǵan eshkimdi mindettemeıdi. Sondyqtan vaksına alam deýshiler úshin qalanyń birqatar saýda oıyn-saýyq ortalyǵynda, emhanalarda t.b. jekelegen oryndarda tegin túrde júrgizilip jatyr, – dedi Nur-Sultan qalasynyń Jastar saıasaty máseleleri basqarmasynyń bólim basshysy Aqulan Tastemir.
Elordada atalǵan aksıa apta sońyna deıin jalǵasady. Jalpy alǵanda elordada 51 myńǵa jýyq stýdent bar. Búgingi aksıa boıynsha túrli JOO-dan 70-ke jýyq stýdent kelip «Spýtnık-V» vaksınasyn aldy.
«Men Qazaq tehnologıa jáne bıznes ýnıversıtetiniń stýdentimin. Búgin «Abý-Dabı Plaza» oıyn-saýyq ortalyǵyna vaksına alýǵa keldim. Bul meniń óz sheshimim. Elimizdiń barlyq stýdentin vaksına alýǵa shaqyramyn. Sebebi karantınge deıingi qalypty ómirge oralýymyz qajet dep oılaımyn. Kınozaldar, oıyn-saýyq ortalyqtary men teatr sıaqty oryndar yńǵaıly qalypqa kelip, betperdesiz júretin kúnder týady degen senemin», — dedi QazTBÝ ýnıversıtetiniń 3-kýrs stýdenti Danıar Beketov.
Aıta keteıik, aldaǵy ýaqytta «Stop Covid» aksıasy ózge qaladaǵy stýdentterge estafeta retinde joldanady.
