4 shilde kúni Astana qalasynyń Dene shynyqtyrý jáne sport basqarmasynyń uiymdastyrýymen elordanyń kórikti orny – «Ǵashyqtar» saiabaǵynda «Astana saqasy» qalalyq týrniri ótedi,- dep habarlaidy Dalanews.kz
Dástúrli ulttyq oiynǵa negizdelgen bul týrnir Astana kúni merekesine arnalyp, eresekter, jastar jáne jasóspirimder arasynda uiymdastyrylady.
Uiymdastyrýshylardyń aitýynsha, jarysqa kásibi sportshylarmen qatar, qala turǵyndary men qonaqtary da erkin qatysa alady. Qatysýshylar asyq atyp qana qoimai, láńgi teýip te óz sheberlikterin synai alady.
«Bul ashyq týrnirge elorda turǵyndary men qonaqtaryn shaqyramyz. Jarys alańyna kelip, ulttyq oiynnan shynaiy lázzat alyńyzdar. Is-shara saǵat 11:00-de bastalady. Qalalyq ákimdiktiń qoldaýymen ótip jatqan merekelik týrnir dostaryńyzben jáne otbasyńyzben jaqsy kóńil kúi syilaitynyna senimdimiz», – deidi Astana qalasynyń asyq atý boiynsha aǵa jattyqtyrýshysy Eskendir Rahmetov.
Sonymen qatar, is-shara barysynda asyqtyń túrleri men asyq atý sport túriniń erekshelikteri tanystyrylyp, kórermenderge qyzyqty málimetter usynylady.
