Nur-Sultan mektepterinde oqý jyly dástúrli oflaın-formatta bastalady. COVID-19 taralýyn boldyrmaý úshin birqatar sharalar qabyldandy: Nur-Sultannyń barlyq oqý oryndary «Ashyq» jobasyna qosyldy, muǵalimder vaksınasıalandy, mektepter qorǵanys quraldarymen jabdyqtalatyn bolady. Aldaǵy oqý jyly qalaı ótetinin elorda ákimi Altaı Kólginov tamyz aıyndaǵy onlaın-keńeste aıtty, – dep habarlaıdy Dalanews.kz.

– Ótken oqý jyly ustazdar men oqýshylar úshin ońaı bolǵan joq. Osyǵan qaramastan, pedagogtar, oqýshylar jáne olardyń ata-analary qashyqtan oqytý formatynan óz deńgeıinde ótkerdi. Olar shydamdylyq tanytyp, oqýǵa jáne sapaly bilim alýǵa nıet bildirgenin aıtýǵa tıispiz. Qashyqtan oqytý oflaın oqytýdyń ornyn basa almaıdy. Joǵary sapaly bilim alý kerek.

Memleket basshysynyń tapsyrmasy boıynsha jańa oqý jylyn dástúrli formatta ótkizýdi josparlap otyrmyz. Ol úshin barlyq bilim berý uıymdary «Ashyq» júıesine qosyldy. Bul joba óz tıimdiligin kórsetti, al súzgi bizdiń pedagogtar men oqýshylardy qaýipsizdendirýge múmkindik beredi. Sonymen qatar, mekteptiń medısınalyq pýnkteriniń jumysyn kúsheıtý, oqý oryndaryn qorǵanys quraldarymen jabdyqtaý tapsyryldy. Saqtyq sharalary tolyq qabyldanýy tıis, – dep atap ótti Altaı Kólginov.

Elorda ákimi muǵalimder men oqý oryndarynyń qyzmetkerleri, sondaı-aq ata-analardyń ózderi arasynda jappaı vaksınasıalaýdyń mańyzdylyǵyn erekshe atap ótti.

Búginde elordada pedagogtardyń 99%-y (bul 16 myńnan astam) jáne tehnıkalyq personaldyń 97%-y (5 myńǵa jýyq) vaksınasıalandy. Vaksınasıa sizdiń densaýlyǵyńyzdy da, aınalańyzdaǵy jandardyń jáne jaqyndaryńyzdyń densaýlyǵyn qorǵaýǵa múmkindik beredi. Vaksınasıa arqyly ujymdyq ımýnıtet qalyptasqannan keıin ǵana qala burynǵy, karantınge deıingi rejımge orala alady.