– وتكەن وقۋ جىلى ۇستازدار مەن وقۋشىلار ءۇشىن وڭاي بولعان جوق. وسىعان قاراماستان، پەداگوگتار، وقۋشىلار جانە ولاردىڭ اتا-انالارى قاشىقتان وقىتۋ فورماتىنان ءوز دەڭگەيىندە وتكەردى. ولار شىدامدىلىق تانىتىپ، وقۋعا جانە ساپالى ءبىلىم الۋعا نيەت بىلدىرگەنىن ايتۋعا ءتيىسپىز. قاشىقتان وقىتۋ وفلاين وقىتۋدىڭ ورنىن باسا المايدى. جوعارى ساپالى ءبىلىم الۋ كەرەك.
مەملەكەت باسشىسىنىڭ تاپسىرماسى بويىنشا جاڭا وقۋ جىلىن ءداستۇرلى فورماتتا وتكىزۋدى جوسپارلاپ وتىرمىز. ول ءۇشىن بارلىق ءبىلىم بەرۋ ۇيىمدارى «Ashyq» جۇيەسىنە قوسىلدى. بۇل جوبا ءوز تيىمدىلىگىن كورسەتتى، ال سۇزگى ءبىزدىڭ پەداگوگتار مەن وقۋشىلاردى قاۋىپسىزدەندىرۋگە مۇمكىندىك بەرەدى. سونىمەن قاتار، مەكتەپتىڭ مەديسينالىق پۋنكتەرىنىڭ جۇمىسىن كۇشەيتۋ، وقۋ ورىندارىن قورعانىس قۇرالدارىمەن جابدىقتاۋ تاپسىرىلدى. ساقتىق شارالارى تولىق قابىلدانۋى ءتيىس، – دەپ اتاپ ءوتتى التاي كولگىنوۆ.
ەلوردا اكىمى مۇعالىمدەر مەن وقۋ ورىندارىنىڭ قىزمەتكەرلەرى، سونداي-اق اتا-انالاردىڭ وزدەرى اراسىندا جاپپاي ۆاكسيناسيالاۋدىڭ ماڭىزدىلىعىن ەرەكشە اتاپ ءوتتى.
بۇگىندە ەلوردادا پەداگوگتاردىڭ 99%-ى (بۇل 16 مىڭنان استام) جانە تەحنيكالىق پەرسونالدىڭ 97%-ى (5 مىڭعا جۋىق) ۆاكسيناسيالاندى. ۆاكسيناسيا ءسىزدىڭ دەنساۋلىعىڭىزدى دا، اينالاڭىزداعى جانداردىڭ جانە جاقىندارىڭىزدىڭ دەنساۋلىعىن قورعاۋعا مۇمكىندىك بەرەدى. ۆاكسيناسيا ارقىلى ۇجىمدىق يممۋنيتەت قالىپتاسقاننان كەيىن عانا قالا بۇرىنعى، كارانتينگە دەيىنگى رەجيمگە ورالا الادى.
