Qazaqstanda investorlar quqyǵyn qorǵaýǵa arnalǵan arnaiy "prokýrorlyq súzgi" mehanizmi engizildi. Bul týraly búgin Memleket basshysy Sheteldik investorlar keńesiniń 37-shi plenarlyq otyrysynda aitty. Biyldan bastap memlekettik organdar Bas prokýratýranyń aldyn ala kelisiminsiz investorlarǵa qatysty tekserý júrgizýge, ákimshilik is qozǵaýǵa, talap aryz berýge nemese qandai da bir shekteý qoiýǵa quqyly emes, dep habarlaidy Dalanews.kz.
"Biz Ulttyq tsifrlyq investitsiialyq platformany iske qostyq. Ol investitsiialarǵa qatysty memlekettik qyzmetterdi "bir tereze" qaǵidaty boiynsha biriktirip, keńes berýden bastap ruqsat alýǵa deiingi barlyq úderisti qamtidy. Budan bólek, iskerlik belsendilikti yntalandyrý jáne ekonomikaǵa jeke investitsiia tartý úshin jańa Salyq kodeksi Senat qaraýyna engizildi. Qujat jergilikti óndiristi damytatyn investorlarǵa maqsatty jeńildikter berýdi jáne qosylǵan quny joǵary ónim eksporttaýshylardy qoldaýdy qarastyrady", – dedi Prezident.
Memleket basshysy investorlarmen yqpaldastyqtyń perspektivaly baǵyttaryna, atap aitqanda, Qazaqstannyń indýstriialyq áleýetin damytý máselesine toqtaldy.
"Taý-ken salasy – elimizdiń óńdeý ónerkásibiniń negizgi tiregi bolyp qala beredi. Qazaqstan taý-ken ónerkásibi men metallýrgiianyń jahandyq mańyzyn túsine otyryp, investorlarǵa ashyq, jan-jaqty zańnama arqyly turaqty ári qolaily iýrisdiktsiia qalyptastyrdy. Júrgizilip jatqan reformalardyń nátijesinde elimizdegi geologiialyq barlaý jumystaryna álemdik iri oiynshylar – Rio Tinto, Fortescue, Ivanhoe, First Quantum jáne Tech Resources kompaniialary keldi. Jańa Salyq kodeksinde shikizatty el ishinde tereń óńdeýdi yntalandyratyn roialti tártibi qarastyrylady. Elimizdiń bai mineraldy-shikizattyq bazasy, jer qoinaýyn paidalanýdaǵy zamanaýi zańnamasy men ashyq salyq júiesi jahandyq tizbektegi mańyzdy mineraldardy jetkizý boiynsha strategiialyq ornymyzdy qamtamasyz etetinine senimdimiz", – dedi Prezident.
Buǵan deiin Memleket basshysy sheteldik investorlar aldynda biylǵy bes aida Qazaqstan ekonomikasy 6 paiyzǵa óskenin aitqan bolatyn.
