Qazaqstandaǵy jumyssyzdyq deńgeii biylǵy jarty jyldyqta 4,6 paiyz mańaiynda turaqtady. Eńbek naryǵynyń negizgi tiregi – 7,1 million jaldamaly qyzmetker. Al ózin-ózi jumyspen qamtyǵandar sany – shamamen 2,1 million. Bul týraly Úkimet otyrysynda Eńbek jáne halyqty áleýmettik qorǵaý vitse-ministri Asqar Biahmetov málim etti,dep habarlaidy Dalanews.kz.
Ministrlik ókili eńbek naryǵyndaǵy negizgi betburystar men syn-qaterlerge jeke toqtaldy.
Basty úrdister qatarynda tsifrlandyrýdyń keń etek alýy, elektrondy saýdanyń artýy jáne frilans salasynyń damýy tur. Buǵan qosa, eldegi demografiialyq dúmpý eńbek naryǵyna qysymdy kúsheitýde. Sarapshylardyń boljamyna súiensek, 2035 jylǵa deiin jyl saiyn eńbek jasyndaǵy jastar sany 360 myń adamǵa kóbeiip otyrady. Munyń barlyǵy jumys oryndaryna suranysty eselep arttyrady.
Biahmetovtyń aitýynsha, basty qiyndyq – eńbek naryǵy men ekonomika qajettiliginiń sáikes kelmeýi. Keibir mamandyqtar birtindep suranystan shyǵyp, ózektiligin joǵaltyp jatyr. Esesine IT-mamandary, dron operatorlary, jeke tálimgerler siiaqty jańa mamandyq ielerine degen qajettilik kúrt ósken.
"Aimaqtar arasynda da aiqyn teńsizdik bar. Elimizdiń ońtústiginde jumys kúshi artyǵymen bolsa, soltústikte, kerisinshe, maman tapshy. Ishki kóshi-qon esebinen iri qalalarda eńbek naryǵy shekten tys tolyp, áleýmettik, kommýnaldyq jáne kólik infraqurylymyna salmaq túsip jatyr. Al keibir óńirlerde ekonomikanyń ártaraptanbaýy jumysqa ornalasý múmkindigin taryltyp otyr", – dedi vitse-ministr.
Ol eńbek naryǵyndaǵy taǵy bir kúrdeli másele retinde kóleńkeli jumyspen qamtý úlesin atady.
Qazaqstandaǵy eńbekke jaramdy adamdardyń shamamen 30 paiyzy zeinetaqy júiesinen tys qalyp otyr.
Sonymen qatar jekelegen salalarda eńbek standarttarynyń bolmaýy da máseleni qiyndata túsedi.
Sarapshylardyń esebi boiynsha, aldaǵy jyldary eńbek naryǵyna 3 milliondai maman qajet bolady. Bul kásiptik standarttardy qaita qarap, bilim berý baǵdarlamalaryn jańartýdy jáne jumysshylardy jappai qaita daiarlaýdy talap etedi.
