2024 jyldyń qorytyndysy boiynsha memlekettik eńbek inspektorlary respýblikanyń 296 kásiporny 18,8 myń jumyskerge 4,5 mlrd teńgege jalaqy boiynsha bereshek ekenin anyqtady. Sonymen birge túrli uiymdarda júrgizilgen tekserýler barysynda 8,1 myń eńbek quqyǵynyń buzylýy anyqtaldy, dep jazady Dalanews.kz.
QR Eńbek jáne halyqty áleýmettik qorǵaý ministrligi baspasóz qyzmetiniń habarlaýynsha, jalaqy boiynsha bereshegi bar kásiporyndardyń basshylaryna oryndaýǵa mindetti 251 uiǵarym berildi jáne 51 mln teńgeden astam somaǵa aiyppul salyndy.
"Qabyldanǵan sharalardyń, onyń ishinde jalaqy boiynsha bereshekti óteýdiń qatań kesteleri men merzimderin belgileýdiń nátijesinde 17,7 myńnan astam jumyskerdiń quqyqtary qorǵaldy. Olarǵa 3,7 mlrd teńge tólendi", delinedi ministrlik habarlamasynda.
Budan basqa, eńbek zańnamasynyń saqtalýyna memlekettik baqylaýdy qamtamasyz etý máseleleri QR Eńbek jáne halyqty áleýmettik qorǵaý ministrliginiń erekshe baqylaýynda.
2024 jyly memlekettik eńbek inspektorlary 5 577 tekserý júrgizdi, onyń barysynda 8 122 buzýshylyq anyqtaldy, onyń ishinde:
- eńbek salasynda – 6 219;
- eńbek qaýipsizdigi jáne eńbekti qorǵaý boiynsha – 1 835;
- halyqty jumyspen qamtý boiynsha – 68.
Jumys berýshilerge 3 326 uiǵarym berilip, 408,5 mln teńge somasyna 3 548 ákimshilik aiyppul salyndy. Qabyldanǵan sharalardyń nátijesinde 36,4 myńnan asa jumyskerdiń eńbek quqyǵy qorǵaldy.
