Túrkistan oblysy ákimi Darhan Satybaldynyń tóraǵalyǵymen sáýlettik jobalar talqylanǵan jiynda oblysta salynatyn jáne salynýy yqtimal nysandardyń jobasy saralandy. Óńir basshysy árbir sáýlettik jobaǵa jeke-jeke toqtalyp, jaýapty basqarma men mamandarǵa tiisti tapsyrmalar berdi.
– Elge qajetti ári týrizmdi damytýǵa serpin beretin nysandar salýǵa basymdyq berilsin. Bos, qoldanylmai turatyn ǵimarattar kerek emes. Jańa ǵimarattar qalanyń Bas josparymen jáne damý tujyrymdamasymen úndesýi tiis.
Máselen, sport ǵimarattaryn alaiyq. Qansha ǵimarat kerek? Qaida ornalasqany jón? Ol salynǵan turǵyndarǵa qanshalyqty oń áser etedi? Mádeniet, týrizm, bilim nysandaryn salýda osy suraqtar nazarǵa alynyp, sáýletshiler atalǵan sala ókilderimen aqyldasýlary qajet.
Ár ǵimarat qalanyń sánine sán qosatyndai sándi ári ózara úilesimdi bolǵany abzal. Tarihi-mádeni ortalyq mańyndaǵy jeke úilerden saiahatshylarǵa arnalǵan shaǵyn hostelder jasaqtaý úshin jobalar usynylsyn. Ol úiler qazaqy naqyshtaǵy oiý-órnektermen bezendirilýi kerek, – dedi Darhan Satybaldy.
Májiliste oblysta júzege asyrylýy múmkin 13 nysannyń syzbanusqasy usynylyp, talqyǵa tústi. Túrkistan oblystyq sáýlet jáne qala qurylys basqarmasynyń basshysy Nurlyjan Bókebaev Shyǵys bazary, «Jaily mektep» jobasy arqyly salynatyn bilim uiasy, Mádeni-rýhani ortalyqtaǵy avtoturaq, ákimshilik-iskerlik ortalyǵyndaǵy alleia, jańa týristik baǵyt, Sairam aýdanyndaǵy «Neke saraiy» jobalary týraly baiandady.
Sonymen birge jiynda Túrkistan qalasynda gimnastika mektebin, Olimpiadalyq rezerv mektebin jáne Joǵary sport sheberligi mektebin salý arqyly sport qalashyǵyn qalyptastyrý jóninde usynys berildi. Beineleý óneri murajaiyn salý men Bekzat Sattarhanov kóshesiniń boiyna kishi sáýlettik formalardy ornatý jobasy da usynyldy.
Atalǵan jobalar týraly Túrkistan qalasy ákiminiń orynbasary Baidýlla Orazbekovtiń, «Sáýlettik biýro» mekemesiniń basshysy Erkin Júsipovtiń de usynystary tyńdaldy. Jobalardyń keibiri qoldaý tapsa, birqataryn tolyqtyrý jóninde tapsyrma berildi.
