Jetisý oblysynda Qazaqstan azamattyǵyn saqtai otyryp, elden tys jerde turyp kelgen azamattyń toqtatylǵan zeinetaqy tólemderi qaita qalpyna keltirildi. Oǵan tólenbegen kezeń úshin 2,3 mln teńgeden astam qarajat esepteldi, dep habarlaidy dalanews.kz.
Jetisý oblysynyń prokýratýrasy shetelge ketken, biraq Qazaqstan azamattyǵyn saqtaǵan azamattardyń zeinetaqy quqyqtaryn qorǵaý boiynsha jumystar júrgizip jatyr.
Osy jumys aiasynda prokýratýra Kóksý aýdany turǵynynyń quqyqtaryn qalpyna keltirdi. Azamattyń Qazaqstan azamattyǵyn saqtaǵanyna qaramastan, el aýmaǵynan tys jerde turýyna bailanysty zeinetaqy tólemderi toqtatylǵan.
Qabyldanǵan sharalardyń nátijesinde zeinetaqy tólemderi 2023 jylǵy 1 shildeden bastap qaita bastaldy. Al tólemder toqtatylǵan kezeń úshin azamatqa 2,3 mln teńgeden astam qarajat esepteldi.
Prokýratýranyń málimetinshe, bul sheshim Qazaqstan Respýblikasy Konstitýtsiialyq Sotynyń №79 normativtik qaýlysynda kórsetilgen quqyqtyq ustanymǵa sáikes qabyldanǵan.
Atalǵan qaýlyǵa sáikes, Qazaqstan azamaty zańda belgilengen ózge talaptardy oryndaǵan jaǵdaida, memlekettik bazalyq zeinetaqy jáne jasyna bailanysty zeinetaqy tólemderin alý úshin Qazaqstan aýmaǵynda turaqty turýy mindetti emes.
Jetisý oblysynyń prokýratýrasy azamattardyń osyndai quqyqtarynyń buzylý faktilerin anyqtaý jáne olardy qalpyna keltirý jumystaryn jalǵastyratynyn atap ótti.
Bul jumys azamattardyń áleýmettik qamsyzdandyrylýǵa konstitýtsiialyq quqyqtaryn qorǵaýǵa jáne zań talaptarynyń birkelki qoldanylýyn qamtamasyz etýge baǵyttalǵan.
