Statistika agenttiginiń burynǵy tóraǵasy Anar Meshimbaeva 2009 jyly sanaqtan keiin 746 million teńge kóleminde aqsha jymqyrdy degen aiyppen 5 jyl jazasyn ótep shyqqan bolatyn. Eks-shendi keiin "Ómir synaq" atty kitap ta shyǵarǵan. Ol Nege.kz saityna bergen suhbatynda Nazarbaev pen Másimovke, Qojamjarovqa qatysty biraz shyndyqtyń betin ashty, - dep habarlaidy Dalanews.kz.
2009 jyly Meshimbaeva men onyń eki orynbasaryna qatysty atyshýly qylmystyq is qozǵalǵan bolatyn. Artynsha sheneýnik Túrkiia asyp, keiin Máskeýge ketkeni el aýzynda júrdi. Tipti ol 3 jyl kóleminde izdeýde boldy. Burynǵy tóraǵanyń aitýynsha, mundai sheshimge ol Nazarbaevtyń buiryǵymen barǵan.
"Elden ketpeimin, eger qashsam, shynymen "aqshany urlady" dep aitady" dedim. Biraq prezident "Eshteńeden qoryqpa. Ári ketse, bir jyl nemese bir jarym jyldan keiin qaitaryp alamyz. Ol kezde bári tynyshtalady" dedi.
Eń bastysy "seniń eki orynbasaryń da túrmege otyrmaidy" degen ýáde bergen. Negizi sol ekeýin bosatsyn dep ketip qalǵan edim.
Óz basym prezidentke sendim ǵoi. "Sottalyp ketem-aý" degen tittei de kúmán bolmady. Al keiin "bálkim, ketpegende basqasha bolar ma edi" degen oi da keldi. Biraq naqty bilmedim. Múmkin, elden ketpesem, báribir sottap jiberetin be edi.
Biz bári ádiletti, shynaiy bolady dep kúttik. Alaida olarǵa bul oiyn siiaqty.
Bireý bylai aitsa, oǵan senedi, ekinshi bireý basqasha pikir bildirse, "túrmege otyrǵyzaiyq, sabaq bolsyn" deidi. Olar adamnyń ómirin emes, saiasatty oilaidy. Bul jerde bizge qarsy jumys istegen Qarjy politsiiasynyń basshysy Qairat Qojamjarov qana emes, arnaiy top boldy ǵoi", - dep áńgimeledi sotty bolǵan burynǵy sheneýnik.
Meshimbaevanyń sózinshe, sotta sanaqqa blank, qural-jabdyq usynǵan qosalqy merdiger kompaniialar salyq tólemei, qarajatty jalǵan esep-shottary arqyly qolma-qol aqshaǵa ainaldyrǵanyn dáleldei almaǵan.
"Onyń bárin aittyq qoi. Biraq bul sotqa kerek emes edi. Qarjy politsiiasy qalai jetkizdi, sot sony jaza saldy. Bul kompaniia maǵan eshqandai qarjyny para retinde usynǵan joq. Alaida Qarjy politsiiasy "Kompaniia qolma-qol aqshany Meshimbaevaǵa para berý úshin shyǵarǵan" degen ýáj aitty. Sondai-aq, "bul qarjyny meni aldy jáne sol kezdegi premer-ministr Kárim Másimovke berdi" dep shyǵardy. Biraq aqshany meniń alǵanym jáne Másimovke bergenim týraly dálel izdegen de joq. Qarjy politsiiasyna Másimovti ornynan alý kerek boldy.
Sebebi sol kezde bári kelesi prezident Másimov bolady dep kútti. Menińshe, munyń bári Másimovti ornynan ketirý úshin jasaldy.
Buǵan qalai kóz jetkizdim deisiz ǵoi. Eki orynbasarymnyń basyna qap kigizip, "Meshimbaeva para alyp, ony Másimovke aparyp bergenin rastańdar!" degen. Sosyn olardan keiin maǵan dál solai jasap, "aqshany Másimov aldy" dep aitqyzbaqshy boldy. Bar jospary – Másimovti qamatý. Árine, eki orynbasarym da maǵan qarsy eshteńe degen joq. Sebebi orynbasarlaryma da eshkim para bergen joq. Joqty bar dep qalai aitady?" - deidi ol.
Meshimbaeva Nazarbaev týraly da qandai pikirde ekenin aitty.
"Ótinishti sottalǵan ár adam jaza alady. Biraq men onda kinálimin degen joqpyn. "Men eshteńe urlaǵan joqpyn. Meniń erte shyǵýyma qolushyn berińiz" dep Statistika salasyna modernizatsiia jasaǵanymdy qysqa ǵana jazdym. Biraq ol kinásiz ekenimdi sol kezde de bildi, qazir de biledi. Sol úshin erterek shyǵardy dep oilaimyn. Jalpy bireýge baǵa beretin nietim joq. Bálkim, ol kisi ómirden ótken soń naqty baǵasyn alatyn shyǵar. "Ýaqyt – bezben" deidi ǵoi.
Prezident bop turǵanda el úshin durys sheshim qabyldaǵan kezderi kóp. Biraq sońǵy kezde óziniń jáne otbasynyń ainalasyndaǵy bylyqtary men qylmystary áshkere bolýy qoǵamda teris kózqaras týǵyzdy.
Shyn máninde, bizdegi bailyqpen halqymyz óte jaqsy ómir súrýi tiis edi. Eger zaýyt, fabrikalarǵa, ónerkásipke der kezinde modernizatsiia jasap, aqshany sol jerge quiǵanda qazir basqa, gúldengen Qazaqstan bolýy múmkin edi", - dedi ol.
Eks-shendi bas bostandyǵynan aiyrylǵan ýaqytyn "Jaýǵashty" áielder koloniiasynda ótkizgen.
