Senatordyń aitýynsha, aýyl sharýashylyǵy taýaryn óndirýshiler elimizdiń ishinde óńdeý salasyn damytýǵa múddeli emes jáne biryńǵai shikizat eksportyna bet burǵan.
Salalyq ministrliktiń aqparaty boiynsha, 2021 jyly AÓK ónimi eksportyndaǵy jalpy kólemniń tek 37%-y ǵana óńdelgen taýarlardyń úlesine tiip otyr.
– Astyq óńdeý kásiporyndary nebári 33% qýatymen jumys istep keledi. Qazaqstannyń astyq óńdeýshiler odaǵynyń málimetteri boiynsha, búginde elimizdegi árbir tórtinshi diirmen ǵana jumys isteidi.
Ósimdik sharýashylyǵy ónimderiniń eksporty ulǵaiyp jatqan kezde, onyń kólemi 2021 jylmen salystyrǵanda 14%-ǵa ǵana ósken. Naqty taldaýdyń, tiisti qoldaý sharalary men qaýipterdi baǵalaýdyń joqtyǵynan Qazaqstan kórshi elderdegi óńdeý salasyn damytýǵa yqpal etip otyr, – dedi Álibek Náýtiev.
Senator sonymen qatar aýyl sharýashylyǵy ministrligi 5 jyl boiy elimizdegi Astyq óńdeýdi qoldaý jáne damytý jónindegi jol kartasyn kelise almai kele jatqanyn atap ótti.
Óz óndirisimizdiń tómendeýine bailanysty naryq importtyq azyq-túlikke tolyp ketti. 2021 jylmen salystyrǵanda ashytylǵan sút ónimderi, sút, et konservileri, irimshik jáne súzbe, sary mai óndirisi 4-ten 9%-ǵa deiin tómendedi.
Depýtat osyǵan bailanysty Úkimet basshysyna problemalardy sheshý sharalaryn usyndy.
– Birinshi kezekte AÓK kólemderin ulǵaitý men óńdeýge basty nazar aýdarylýy tiis. Bizdiń oiymyzsha, oǵan topyraqtyń qunarlylyǵy men jem-shóp bazasy bar aimaqtardyń salaǵa beiimdelýin eskere otyryp qol jetkizýge bolady. Ol ónimniń ózindik qunynyń negizin quraidy. Sýbsidiialaý tetikterin qaita qaraý da mańyzdy. Taldaý kórsetkendei, aýyl sharýashylyǵynyń odan ári damýy sharýashylyqtardyń uiymdasýyna bailanysty, al jeke qosalqy sharýashylyqtardy qoldaýdyń naqty áseri joq.
Taýarlardyń importy ulǵaia túsken kezde naryqty qorǵaý sharalaryna mańyz berý jáne kúsheitý kerek. Sonymen qatar, otandyq ónimdi eksporttaý kezinde basqa elderdiń kóptegen kedergileri men tosqaýyldaryna jaýap retinde dál sondai sharalardy qoldaný kerek, – dedi Náýtiev.
https://dalanews.kz/news/89268-qaytqan-malda-qayyr-bar-nazarbaevan
