QR Bas prokýrory Jaqyp Asanovtyń nazaryna
ASHYQ HAT
Qurmetti Jaqyp Asanov myrza!
2016 jyldyń 16 qazanynda Almaty oblysy, Talǵar aýdany, Panfılov aýylyndaǵy úıimizden alańsyz jumysqa bet alǵan anam Kúldarı Ábilqaıyrovany jol ústinde kólik qaǵyp, ajal qushty.
Sheshemdi 40 km/saǵat jyldamdyqpen júrýge tıisti jerden 90 km jyldamdyqpen qarsy baǵytpen kele jatqan kz 717 ZKA 05 memlekettik nómirli BMV kóligi soǵyp, 25 metr jerge deıin súırep áketken.
Jol ústinde anamdy qaǵyp, mert qylǵan júrgizýshi Úmitbekov Nursultan Jambyluly arada úsh aı ótpeı jatyp raqymshylyqqa ilikti.
Elbasymyzdyń Táýelsizdiktiń 25 jyldyqqa arnap jarıalaǵan raqymshylyǵyna Nursultan Úmitbekov qalaı, qandaı joldarmen, kimderdiń yqpaly arqyly ilikti?
Osy máseleniń mán-jaıyn egjeı-tegjeıli ashyp jazyp, sizden kómek suraımyn. Aıdyń kúnniń amanynda anasynan aırylyp, azamattyq quqyǵyn qorǵaı almaı zar jylap júrgen bizge qol ushyn sozýyńyzdy ótinemin.
Qaıǵyly oqıǵa 16 qazan kúni tańǵy saǵat 6-dan 22 mınýt ketkende bolǵan. Joldyń eki jaǵynda ornalasqan dúken men jem satatyn ortalyqtyń vıdeo-taspasyna oqıǵanyń qalaı bolǵany tolyǵymen túsken.
Biraq, jol oqıǵasyna qatysty qylmystyq istiń anyqtaýshysy (doznavatel) Oleg Alıbekov qolymyzdaǵy vıdeo-taspaǵa «ashylmaı qoıdy» degen negizsiz syltaýmen saraptama taǵaıyndaýdan bas tartty.
Qylmystyq istiń bar shyndyǵyn ashatyn vıdeo-jazbaǵa súıenýdiń ornyna jazbany bergen azamattarǵa baryp, «bul taspany nege beresizder?» dep qoqan-loqy jasady.
Qarapaıym halyqtyń quqyǵyn qorǵaýǵa tıisti laýazymdy tulǵanyń bul qylyǵyna qalaı túsinemiz? Bul bir.
Ekinshiden, bizdiń qolymyzdaǵy 6 saǵattyq vıdeo-taspada Oleg Alıbekovtiń isti qalaı teksergeni anyq kórinedi. Ol jerde qylmystyq iske qatysy joq bóten adamdar áldebir kelisimder jasap (Bul isti burmalaýda kz 222 PDA 02 (TOYOTA PRADO) nómirli kólikpen kelgen er azamat belsendilik tanytty. Jalpy, qylmystyq istiń týra joldan taıqyp ketýine sol kóliktiń ıesiniń yqpaly mol boldy dep oılaımyz. Keıin bilgenimizdeı bul jigit Nursultan Úmitbekovtiń laýazymdy qyzmet isteıtin týysy kórinedi) sabylyp júr. Oleg Alıbekovtiń meniń anamnyń qanyn «saýdalap», dáp bir bazardaǵydaı iske qatyssyz adamdarmen áldenelerdi talqylaýǵa qandaı quqyǵy bar?
Úshinshiden, anyqtaýshy Oleg Alıbekov oqıǵanyń barysyn kórsetetin syzbany júz paıyzǵa ózgertip, qylmyskerlerdiń yǵyna jyǵylǵanyn qalaı túsinerimizdi bile almaı, dal bolyp otyrmyz.
Birinshi sýret. Anamdy qaqqan mashınanyń orny kórsetilgen syzba. Bul sýret kúdikti Nursultan Úmitbekovtiń qarsy baǵytpen júıitkip kele jatyp, anamdy qaqqanyn tolyq dáleldeı alady (ony vıdeodan da anyq baıqaýǵa bolady).
Ekinshi sýret. Oleg Alıbekovtiń qylmystyq iske qatysty syzbasy. Syzbadaǵy ólshemder durys bola tura, kóliktiń kelip toqtaǵan baǵytyn teris tarapqa aınaldyryp jibergen. Sonyń nátıjesinde qarsy baǵytpen kele jatyp anamdy qaqqan qylmyskerdi óz jolymen kele jatqandaı etip ózgertken. Anyqtaýshy óziniń qyzmettik ókilettiligin paıdalana otyryp, naqty derekterdi ne úshin bulaı burmalap otyr?
Tórtinshiden, Oleg Alıbekov bizdiń tarap taǵaıyndaǵan Zańdy ókildiń joǵarydaǵy derekterin qulaǵyna da ilgen joq. Zańdy ókilimiz istiń barysymen tanysý úshin anyqtaýshyǵa bir neshe ret habarlasty. Ol «İske qatysty saraptama qortyndysy daıyn bolǵan joq» dep bizdi aldap júrip, 28 jeltoqsan kúni telefonmen habarlasyp, 29-y kúni (Talǵar aýdany prokýrorynyń qoly qoıylmaǵan) Úmitbekov Nursultan Jambylulynyń raqymshylyqqa ilingeni týraly qaýlyny qolymyzǵa bere saldy. Raqymshylyq týraly Zańda Zańdy ókildiń kelisimi bolmasa, qylmyskerdiń raqymshylyqqa ilinbeıtini taıǵa tańba basqandaı etip jazylǵan. Sony bile tura anyqtaýshy jábirlenýshi taraptyń quqyǵyn taptap, Elbasynyń sarabdal saıasatyn aıyptalýshynyń múddesine qaraı buryp jiberdi.
Besinshiden, jol oqıǵasyna qatysty qylmystyq istiń qaýlysynda sheshemizdi kólik farymen soǵyp, nátıjesinde tek basynan soqqy alyp, mert bolǵany kórsetilipti. Oleg Alıbekov anamyzdyń basy áınekke soǵylǵanyn, basy ǵana emes, jambas súıeginiń kúl bolyp ketkenin, aıaǵynyń úsh jerinen, sonymen qosa bir qabyrǵasynyń synǵanyn jasyryp qalǵan.
Besinshiden, anamdy qaqqan kólik is tolyq zerttelip bitpeı jatyp, 16 kúnnen keıin ıesine zańsyz qaıtarylǵan.
Aıyp-turaǵynan ol kólikti Oleg Alıbekov shyǵaryp bergenin myna sýretter dáleldeıdi. QR zańdarynda qylmystyq is tolyǵymen zerttelip bolmaıynsha, aıǵaq zatty qaıtarýǵa, búldirýge, jasyrýǵa bolmaıtyny anyq jazylǵan. Aıǵaq zat qandaı zańdyq negizge súıenip ıesine qaıtaryldy? Ol kólik qalpyna keltirilip tastalǵan joq pa? Aıǵaq zattyń búlinbegenine kim kepildik etedi?
Altynshydan, Úmitbekov Nursultan Jambylulyn kólik júrgizý quqyǵynan aıyrmaǵan. Kólikti aıypturaǵynan shyǵara salyp, tórt kúnnen keıin, ıaǵnı jeltoqsan aıynyń 8-i kúni (2016 jyl) saqtandyrý jasap alǵan. Demek, aıyptalýshy qazir anamdy qaqqan kólikpen júr deýge tolyq negiz bar. Keshe ǵana joldyń qarsy betine shyǵyp ketip (jalpy deni saý pende birneshe kólik erkin sıatyn úlken jolda qarsy betke shyǵa ma?) adam soǵyp óltirgen azamat taǵy basqalardyń qanyn moınyna júktemesine kim kepil?
Jetinshiden, anamdy qaǵyp ketken jerdegi saǵatyna 40 shaqyrym jyldamdyq júrý kerektigin kórsetken belgi oqıǵadan keıin eki aptadan keıin alynyp tastaldy. Biz es bilgeli tapjylmaı turǵan, osy mańdaǵy mekteptiń oqýshylary ótetin bul belginiń alynyp tastalýynyń sebebi nede? "Kúshti quıryǵymen dıirmen tartadynyń" kebi emes pe?
Qosh. Biz anyqtaýshynyń isti birjaqty júrgizýine baılanysty Almaty oblystyq prokýratýrasy men ishki ister departamentine shaǵymdanǵan edik. Prokýratýra raqymshylyq týraly shyqqan qaýlyny buzdy (Eger Alıbekovterdiń isi zańdy bolsa, ol qaýly buzylmas edi dep oılaımyz). Al İİD Oleg Alıbekovtiń ústine jazǵan shaǵymymyzdy tekserýdi anyqtaýshynyń kúnde qasynda júrgen tikeleı bastyǵy Muhıt Sadyrbaevqa tapsyrǵan. Sadyrbaev óz qyzmetkeri Oleg Alıbekov qylmystyq istiń shyndyǵyn osynshama burmalap jatqanda qaıda qarap otyrdy? Bar is ol kisiniń de qolynan ótken joq pa? Qazaqta «qarǵa qarǵanyń kózin shuqymaıdy» degen mátel bar. Sol aıtpaqshy biz Sadyrbaevqa senbeımiz. Nege deısiz be?
Osynshama zańsyzdyqtar oryn alyp jatqan soń, ádildik izdep buqaralyq aqparat quraldarynyń kómegine júgindik. (Siltemeden qarańyz. http://kaznews.kaztrk.kz/society/12559-koligimen-adam-kagyp-oltirgen-azamat-bostandykta-zhur.html «Qazaqstan» arnasynyń jańalyqtar qyzmeti)
https://www.youtube.com/watch?v=l0sMdvYBME4
31 arnanyń jańalyqtary
https://www.youtube.com/watch?v=4wxMJ2RxJGg
"Almaty" arnasynyń jańalyqtar qyzmeti
BAQ jýrnalıseri Muhıt Sadyrbaevtyń qaraýyna túsken iske qatysty pikirin bilmek boldy.
Ol Almaty oblystyq ishki ister departamentiniń baspasóz qyzmetine málimet jiberetinin, sol jaqtan resmı pikir beriletinin aıtty.
Almaty oblystyq İİD baspasóz qyzmetiniń jetekshisi Aıman Myrzabekova Muhıt Sadyrbaev daıyndap bergen jalǵan aqparatty búkil Qazaqstan halqyna jarıalap jiberdi. Aıman Myrzabekova: «Jábirlenýshi taraptyń ókili qosymsha usynǵan beınejazba boıynsha da saraptamalar júrgizilgen. Qazirgi kúni atalǵan fakt İİD anyqtaý basqarmasy men prosesýaldyq sheshim qabyldaý úshin joldandy» deıdi.
Eger joǵarydaǵy vıdeo-jazbaǵa saraptama júrgizilse, onymen bizdiń Zańdy ókilimiz nege tanyspaǵan? Bizge bir kún buryn Oleg Alıbekov «Ol beıne-jazbanyń ashylmaǵanyn rastaıtynyn qujaty bar ekenin, sondyqtan da saraptama jasalmaıtynyn» málimdegen bolatyn.
Sonda Alıbekov ótirikshi me, Sadyrbaev pa?
Qurmetti, Jaqyp Asanov myrza!
Men «osynshama zańsyzdyqtar nege oryn alyp otyr?» degen suraqqa jaýap izdep, aqyry mynandaı kúdikti sheshimge keldim. Eger de Oleg Alıbekov aıyptalýshydan para alyp, isti sotqa jetkizbeı jaýyp tastaýǵa sóz bermese, bizdiń tarapqa bir ret bolsyn kóz qıyǵyn salar edi. Ol qazir ózine mindettelgen anyqtaýshylyq qyzmetin umytyp, kúdiktiniń advokatyna aınalyp aldy. Bul zaıyrly memlekettiń Zańyna qanshalyqty sáıkesedi? Osynyń bárin kórip otyryp kókeıime «Oleg Alıbekov Elbasy jarıalaǵan raqymshylyqtan aqsha jasap, qaltasyn qampaıtyp júrgen joq pa eken?» degen saýal tyǵylady. Joǵarydaǵy jaǵdaılardy saraptaı kele, Qazaqstannyń azamaty retinde mundaı kúdikti oı oılaýǵa haqym bar dep oılaımyn.
Qurmetti, Jaqyp Asanov myrza! Anamdy qaǵyp óltirgen Úmitbekov Nursultan Jambyluly QR Zańdary negizinde ózine tıesili jazasyn alsa degen tilegim bar. Al, osy qylmystyq istiń óńin aınaldyryp, Elbasynyń raqymshylyǵyn saýdaǵa salyp júrgen kz 222 PDA 02 (TOYOTA PRADO) memlekettik nómirli kólikpen júretin Nursultan Úmitbekovtiń laýazymdy qyzmette isteıtin týysqany men Oleg Alıbekovti jaýapkershilikke tartyp, tıisti jazasyn alýyna yqpal etseńiz.
Búgin Elbasynyń raqymshylyǵyn jeke múddelerine paıdalanbaq bolǵandar erteń Otanymyzdy saýdalaýy ábden múmkin.
Indıra Sultanqyzy
