Elbasy kásipkerlikti damytatyn zańǵa qol qoidy
Osynaý zańǵa jariialy túrde qol qoiý sharasynda sóilegen sózinde Memleket basshysy egemendik alǵan alǵashqy jyldardan bastap Qazaqstanda naryqtyq ekonomikanyń irgetasy berik institýtsionaldyq alǵysharttary qalyptasqanyn aitty.
– Jeke bastama men erkin kásipkerlik elimizdiń ekonomikalyq damýynyń jáne ál-aýqatymyzdyń artýynyń basty faktoryna ainaldy. Bizdiń reformalarymyzdyń tabystylyǵy men tiimdiliginiń jarqyn mysaly retinde Astanany aitýǵa bolady. Onyń 20 jyldyq mereitoiyn búkil Qazaqstan atap ótýde, – dedi óz sózinde Nursultan Nazarbaev.
Qazaqstan Prezidenti qol qoiylatyn «Qazaqstan Respýblikasynyń keibir zańnamalyq aktilerine kásipkerlik qyzmetti retteýdi jetildirý máseleleri boiynsha ózgerister men tolyqtyrýlar engizý týraly» zańnyń mańyzdylyǵyn erekshe atap ótti.
– Engizilip otyrǵan ózgeristerdiń basty maqsaty – biznesti retteý salasyndaǵy zańnamany jetildire túsý. Zańda memlekettik baqylaý fýnktsiialaryn shamamen 30 paiyzǵa qysqartý kózdelip otyr. Quqyq buzýshylyqtyń aldyn alatyn profilaktikalyq baqylaý institýtyna basa mán berilgen. Tabiǵi monopoliialar men kvazimemlekettik sektor tarapynan kórsetiletin qyzmetter retteledi, – dedi Elbasy.
Sonymen qatar Memleket basshysy biznes shyǵyndaryn jappai tómendetý úshin zańda qarastyrylǵan sharalar jóninde jáne básekege kedergi keltiretin normalardyń alynyp tastalǵany týraly aitty.
– Osy zań arqyly 14 kodeks pen 109 zańǵa shamamen 1 myńǵa jýyq ózgeris engizilip otyr. Osy ózgeristerdiń báriniń dittegen maqsaty biznesti damytý úshin meilinshe qolaily jaǵdai qalyptastyrý jónindegi memlekettiń basty strategiialyq baǵytyna tolyq sai kelip otyr.
Qazirgi ýaqytta iskerlik belsendilikti kúsheitý jáne jurtshylyqty kásipkerlikpen ainalysýǵa tartý úshin barlyq múmkindikti paidalaný asa mańyzdy, – dedi Nursultan Nazarbaev.
Memleket basshysy «Qazaqstan Respýblikasynyń keibir zańnamalyq aktilerine kásipkerlik qyzmetti retteýdi jetildirý máseleleri boiynsha ózgerister men tolyqtyrýlar engizý týraly» zańǵa nelikten jariia qol qoiǵanyn túsindirdi.
«Búgin men kásipkerlik qyzmetti retteýdi jetildirýge baǵyttalǵan zańǵa qol qoiamyn. Osylai ashyq túrde qol qoiýdyń sebebi, bul qujat óte mańyzdy dep esepteimin, ásirese kásipkerlerge.
Halyqqa keńinen túsindirýimiz kerek. Kásipkerler zańnyń mán-maǵynasyn bilýi kerek. Shaǵyn jáne orta biznesti damytý – elimizdegi óte mańyzdy talaptardyń biri.
Sondyqtan men Táýelsizdiktiń birinshi kúninen bastap bul máseleni qolǵa alyp, ylǵi rettep kelemin.
Kásipkerlikpen ainalysýǵa qolaily jaǵdai jasaý úshin júieli jumys júrgizip kelgenimizdi bilesizder. Biznes pen bilik arasynda seriktestik qatynastar ornatý mańyzdy mindet bolyp sanalady.
Sol arqyly kásipker qaýymynyń memleketke degen senimi arta túsetin bolady», – dedi Elbasy.
Sondyqtan Elbasynyń atap ótýinshe, «Qazaqstan Respýblikasynyń keibir zańnamalyq aktilerine kásipkerlik qyzmetti retteýdi jetildirý máseleleri boiynsha ózgerister men tolyqtyrýlar engizý týraly» zańdy Parlament qabyldaǵan.
«Endi men búgin soǵan qol qoiamyn. Bul biznesti damytý, jaǵdai jasaý jolyndaǵy taǵy da bir úlken qadam bolyp sanalady.
Bul qujat biznes salasyn túbegeili jaqsartýy kerek. Meniń tapsyrmamdy oryndaý maqsatymen qabyldanyp otyr. Zań memlekettik organdardyń qadaǵalaý fýnktsiiasyn qysqartý arqyly biznes ókilderiniń erkin jumys isteýine jol ashady.
Biz aldaǵy ýaqytta da kásipkerlikti órkendetý úshin qolaily jaǵdai qalyptastyra beremiz.
Biznes qoǵamdastyǵy elimizdi órkendetýge, halyqtyń ál-aýqatyn arttyrýǵa belsendi atsalysady dep senemin», – dedi Nursultan Nazarbaev.
Sóz sońynda Qazaqstan Prezidenti búginde júzege asyrylyp jatqan «Bes áleýmettik bastama» shaǵyn jáne orta biznes úshin zor múmkindik týǵyzyp otyrǵanyn atap ótip, osy zańnyń qabyldanýy halqymyzdyń igiligi jolynda eldegi kásipkerlik qyzmetti jandandyrýǵa tyń serpin beretinine senim bildirdi.
Aita ketsek, budan buryn memlekettiń biznesti baqylaý qyzmeti qysqaratyny belgili bolǵan.
Ulttyq ekonomika ministri Timýr Súleimenovtiń aitýynsha, mundai ózgertý jańa profilaktikalyq baqylaý institýtyn engizýdi qarastyrady. Ol ákimshilik isti bastamai, quqyq buzýshylyqtardyń profilaktikasyn júrgizedi.
Sonymen qatar ol mundai shara kásipkerlerdiń negizgi qyzmetine kedergilerine bailanysty shyǵyndaryn jáne qysymdy, sybailas jemqorlyqty azaitýǵa múmkindik beretinin aitqan.
«Sonymen birge búgin bar bolǵan 144 saladan 20-sy jáne 544 baqylaý qyzmetinen 108-i alynyp tastalady. Olardy alyp tastaýdyń negizgi sebebi – qaitalanýy jáne júzege asyrý kezinde tiimdiliktiń bolmaýy. Sondyqtan tutynýshylardyń qaýipsizdigi tiisti deńgeide qamtamasyz etiledi», – degen edi Timýr Súleimenov.
