EKSPO igiligi
Óz kezegine sóz alǵan qala basshysy Astana EKSPO-2017 mamandandyrylǵan kórmesinen keiin 16 energetikalyq tehnologiia engizilgenin tilge tiek etti. Ol qalalyq máslihattyń kezekti sessiiasynda:
– Ákimdik 300 injenerden quralǵan topty quryp, olar komissiialyq negizde zertteý jasady jáne EKSPO-nyń 110 jobasyna taldaý júrgizdi. Nátijesinde, olar toǵyz elden tehnologiianyń 16 túrin iriktep aldy. Atap aitqanda, Avstriia, Polsha, Frantsiia, AQSh, Resei, Qytai, Litva, Germaniia memleketterindegi ozyq jobalar elordada paidaǵa asady degen úmittemiz, –dedi. Budan bólek ákim qaladaǵy energiia únemdeý men energiia tiimdilikti arttyrýdyń 2016-2020 jyldarǵa arnalǵan keshendi jospary ázirlengenin aita kele, jylyna biýdjettik sektorda qarjy únemdeý 287,5 mln teńgeni quraitynyn da málimdedi.
Al Astana qalasynyń ákimdigi «EKSPO-2017» kórmesiniń 16 «jasyl» jobasyn iske asyryp, onyń igiligin kórýge tas-túiin daiyn ekenin málimdedi.
Astana qalalyq energetika basqarmasynyń basshysy Baqytbek Japaevtyń aitýynsha, EKSPO-da 140-qa jýyq «jasyl» joba tanystyrylǵan. Onyń ishinde Astanada qoldanýǵa bolatyndai 16 jobany tańdap alynypty. Mańyzdy jobalardyń arasynda Resei, Frantsiia jáne Polshanyń jobalary bar eken. Qazirgi tańda jobalardy investorlarmen birge iske asyrý baǵytynda jumys qolǵa alynǵan.
Al kúni keshe ǵana Úkimet otyrysynda Bilim jáne ǵylym ministri Erlan Saǵadiev «EKSPO-2017» kórmesiniń ideialaryn bilim salasyna engizetin jumys toby qurylǵanyn aitqan edi. Ministr kórmege 55 ýniversitet pen ǵylymi ortalyq ókilderi barǵanyn alǵa tartqan bolatyn. Jalpy EKSPO-ǵa qatysqan eldermen 100-den astam kezdesý ótti. 9 memorandýmǵa qol qoiyldy, ýniversitetter 20-dan astam ekijaqty yntymaqtastyqtyń kelisimderine qol qoiypty. Osylaisha EKSPO-2017 kórmesi Qazaqstandaǵy ǵylymnyń damýyna da barynsha yqpal etkenin baiqaimyz.
Bilim salasy jaiynda aita tússek, endi elimizdegi ustazdar EKSPO-2017 kórmesine qoiylǵan tehnologiialar týraly bilimdi sabaq barysynda qoldanyp, oqýshylardyń tanym kókjiegin arttyra túsetin múmkindikke ie bolýda. QR Bilim jáne ǵylym ministrliginiń ǵylym komitetiniń tóraǵasy Bolat Ábdirásilov bul jaiynda: «Úlken bir toptama bilim berý tehnologiialaryna arnalǵan. Óte kóp eksponat boldy, olardy bizdiń mektepter paidalana alady. Arnaiy aqparattyq alań quramyz. Ol negizgi bilim berý tehnologiialary ornalastyrylatyn sait bolatyn shyǵar. Bul alań árbir mektepke qoljetimdi bolady. Atalǵan sait álemdegi bilim berý tehnologiialary salasyndaǵy jetistiktermen baiytylyp otyrady. Ózderińiz de biletindei, qazirgi ýaqytta bilim berý salasynda oqýlyqtardy, tehnologiialardy jetildirýge baǵyttalǵan óte baiypty ádister paida bolýda», – dedi ol.
Komitet tóraǵasynyń aitýynsha, EKSPO-2017 kórmesi alańynda usynylǵan jetistikter týraly málimetterdi mektepter men joǵary oqý oryndarynyń oqý materialdaryn tolyqtyra túsýge úlken múmkindik beredi eken.
– Biz EKSPO murasyn joǵaltyp almaýymyz kerek siiaqty. Ǵylymi zertteýler úshin, sonymen qatar bilim berý maqsattaryna qajetti barlyq málimetterdi jinaqtaýǵa tyrysamyz. Búginde bizge akademiialyq erkindik berilgen. Iaǵni, kez kelgen oqytýshy óz pániniń mazmunyn, oqytý protsesindegi qoldanatyn tehnologiiasyn, iaǵni ózindik tehnologiiasyn tańdaýǵa quqyǵy bar. Bul bilim berý portaly oqytýshylarymyzǵa ózderiniń sabaq berý ádisin jetildirýge múmkindik beredi, – dedi Bolat Ábdirásilov.
Iá, EKSPO Qazaqstan ekonomikasyna, bilim, ǵylym salasyna airyqsha serpilis bergeni sózsiz. Aldaǵy taiaý bolashaqta bizder onyń jemisin jep, elimizdi órkendete túsetin bolamyz.
N.Áýbákir.
