Súleimenova kóz jumǵan azamattardyń jaqyndaryna kóńil aityp, órt bastalǵanda birinshi bolyp oqiǵa ornyna ormanshylardyń attanǵanyn málimdedi. Alaida 8 maýsymda olar bailanysqa shyǵýdy doǵarǵan.
"Keshe 14 adamnyń máiiti tabyldy. Biz 8 maýsymda 21:00-den keiin, 22:00-ge taiaý bailanysty joǵalttyq. Ratsiiamen sońǵy ret jeldiń birden baǵytyn ózgertip, tútin basqanyn aitty. Barlyǵy durys bolady dep úmittendik. Qoiý tútinnen olardy tabý múmkin bolmady. Keshe máiitteri tabyldy. Osy jaǵdaidy paidalanyp, órt sóndirý kezinde kóz jumǵan azamattardyń otbasy men jaqyndaryna kóńil aitqym keledi", – dedi Zúlfiia Súleimenova.
Ministrdiń sózinshe, jaǵdai áli de kúrdeli. Jel kúsheigen. Sondai-aq aýa raiy boljamyna sáikes aldaǵy birneshe kúnde qatty jel soǵady.
"Jalyndy oqshaýlap, ustap turýǵa tyrysamyz. Kelgen ziian kólemi esepteledi. Komissiia jumys júrgizedi. Barlyǵyn az ýaqytta isteýge tyrysamyz, biraq órt sóndirilgen soń oqiǵa ornyna jyǵý kerek. Órt kezinde mundai jumystardy atqarý qiyn. Degenmen qazirden-aq shyǵynnyń úlken ekenin aitýǵa bolady. Sebebi bul tarihymyzdaǵy eń úlken órt shyǵar. Bul týraly aitý erte, bálkim shyǵyn kólemi milliardtaǵan teńge bolýy yqtimal. Abai oblysyndaǵy jaǵdai – úlken apat", – dedi Zúlfiia Súleimenova.
