Almaty qalasynyń ákimi Darhan Satybaldy men Almaty oblysynyń ákimi Marat Sultanǵaziev Almaty aglomeratsiiasy Jergilikti keńesiniń kezekti otyrysyn ótkizdi. Jiyn barysynda ekologiiany jaqsartý, radialdy joldardy ÚAAAJ-na deiin júrgizý, sondai-aq Almaty taýly klasterin damytý máseleleri qaraldy,- dep habarlaidy Dalanews.kz
Taraptar radialdy joldardyń salynýy qalanyń aglomeratsiiamen kólik bailanysyn jaqsartyp, megapolistiń ortalyq magistraldaryndaǵy júktemeni azaitatynyn atap ótti. Sondyqtan bul máselege erekshe nazar aýdarylady.
Qala men oblys aýmaǵynda Abai jáne Rysqulov dańǵyldaryn, Sain, Tilendiev, Soltústik ainalma jáne Móńke bi kóshelerin ÚAAAJ-na deiin uzartý boiynsha qurylys jumystary jalǵasýda.
«Keńestiń strategiialyq mindetteriniń biri - Almaty aglomeratsiiasynyń kólik infraqurylymyn damytý. Sol sebepti qala shekarasyna deiingi kóshelerdi uzartý jáne olardy oblys aýmaǵynda ÚAAAJ-na deiin salý jumystaryn jedeldetý qajet», – dedi Almaty qalasynyń ákimi Darhan Satybaldy.
Sonymen qatar, oblys aýmaǵynda gaz quiý beketteri bar avtobýs parkin salý qajettiligi de qozǵaldy. Bul shara Almaty qalasynyń Qalalyq mobildilik basqarmasyna qala mańyna qatynaityn baǵyttarǵa gazben júretin avtobýstardy iske qosýǵa múmkindik beredi.
Biyl qala ákimdigi jeke avtoparktermen birlesip 1400 gazben júretin avtobýs pen 118 elektrobýs satyp alýdy josparlap otyr. Bul qalaishilik qoǵamdyq kólikti 100% ekologiialandyrýǵa múmkindik beredi (qala mańy jáne taýly baǵyttardan basqa).
Aglomeratsiia aýmaǵyndaǵy retsiz qurylys máselesi áli de ózekti. Qala shekarasyna jaqyn ornalasqan kópqabatty turǵyn úi qurylysy aglomeratsiianyń iadrosy men shet aimaqtary arasyndaǵy teńgerimsizdikti kúsheitip otyr. Bul kóshi-qondy arttyryp, kólik jáne áleýmettik infraqurylymǵa qosymsha salmaq túsirýde.
Almaty oblysynyń ákimi Marat Sultanǵazievtiń aitýynsha, óńirde qala qurylysy tártibin jetildirý jalǵasady. Onyń ishinde qala mańyndaǵy turǵyn úi keshenderiniń biiktigine shekteý engizý josparlanyp otyr. Qarasai, Talǵar jáne Ile aýdandarynyń bas jospary ázirlenip jatyr, olarda áleýmettik jáne injenerlik infraqurylymnyń qurylýy qarastyrylady.
«Almaty aglomeratsiiasy aýmaǵynda 3,2 millionnan astam adam turady, onyń 1,5 milliony qala mańynda. Aglomeratsiianyń óndiristik jáne týristik áleýetiniń deni Almaty oblysynda shoǵyrlanǵan. Sondyqtan barlyq infraqurylymdyq jáne áleýmettik joba úilestirilgen túrde iske asyrylýy mańyzdy», – dep atap ótti Marat Sultanǵaziev.
Kezdesý barysynda ekologiialyq jaǵdaidy jaqsartý máseleleri de talqylandy. Aýa basseinin lastaýshy negizgi faktorlardyń biri – avtokólik. Qalada kún saiyn ekologiialyq «Evro-0» sanatyndaǵy 172 myńnan astam kólik júredi. Osyǵan bailanysty qalada statsionarlyq jáne mobildi ekobeketterdiń jumysyn kúsheitý josparlanýda. Sonymen qatar tómen shyǵaryndyly aimaqtardy (Low Emission Zone) engizý jobasy ázirlenip jatyr.
Sondai-aq, Almaty taýly klasterin damytý aiasynda zamanaýi týristik infraqurylymdy damytý boiynsha jumystardy úilestirý máseleleri qarastyryldy.
Aita keteiik, Almaty aglomeratsiiasynyń ózegi Almaty qalasy. Onyń quramyna oblystyq jáne aýdandyq mańyzy bar qalalar, Alataý qalasy, 31 aýyldyq okrýg pen 98 eldi meken kiredi.
