Túrkistan oblystyq aýyl sharýashylyǵy basqarmasy basshysynyń orynbasary Nurbol Bekmuratovtyń aitýynsha, jármeńkege Túrkistan oblysynyń barlyq aýdan, qalasynan taýaróndirýshiler qatysyp jatyr.
– Jármeńkege oblys diqandary men taýaróndirýshileri 500 tonnadan astam aýyl sharýashylyǵy ónimderin alyp keldi. Taýarlar 15-20 %-ǵa tómen baǵada satylýda. Bul jármeńke úsh kúnge sozylady. Eger turǵyndar tarapynan suranys joǵary bolsa, mundai is-sharalardy jalǵastyramyz. Diqandarymyz ben kásipkerlerimiz «Ekobazarda» jurtshylyqqa sapaly ónimderin usynýǵa daiyn, – deidi ol.
«Ekobazardaǵy» jármeńkege 89 tonna et jáne et ónimderi, 157,5 tonna kókónis, 23 tonna kartop, 68,5 tonna sút ónimderi, 59 tonna baqsha ónimderi, 51 tonna jemis-jidek, 3 tonna bal, 26 tonna jemis shyryndary men konservilengen ónimderi, 3 tonna balyq, 20 myń dana jumyrtqa jáne 15 tonna nan ónimderi ákelingen. Sonymen birge «Túrkistan» áleýmettik-kásipkerlik korporatsiiasynyń Turaqtandyrý qory arqyly da sheker, un jáne ózge de ónimder arzan baǵada elge usynylýda.
Jármeńke qyrkúiek aiynyń 26-nan 28-ine deiin úsh kúnge jalǵasady.
Túrkistandaǵy «Ekobazar» biraz ýaqyttan beri elge qyzmet kórsetip keledi. Munda kásipkerler men Túrkistan turǵyndaryna jáne týristerge barlyq jaǵdai jasalǵan. Bazar aimaǵynda taýar saqtaýǵa arnalǵan 300 mikroklimattyq qoima bar. Qaýipsizdikti saqtaý úshin kúzet qyzmetkerleri jumys isteidi, beinabaqylaý kameralary ornatylǵan. Barlyq sanitarlyq normalar saqtalǵan. Zamanaýi «Ekobazarda» diqandar óz óniminin bir qoldan, deldaldarsyz, tikelei usynyp keledi.
