KAZ Minerals kompaniiasynyń eki nysanynda eki kún qatarynan órt shyqty. Aldymen Abai oblysyndaǵy Orlov shahtasynan jumysshylar evakýatsiialansa, kelesi kúni Aqtoǵai ken ornyndaǵy baiytý fabrikasynda órt tirkeldi, dep habarlaidy dalanews.kz.
Birinshi jaǵdai 8 tamyzda keshke Jezkent kentindegi Orlov shahtasynda bolǵan. Saǵat 22:00 shamasynda shahtanyń 10-deńgeiinde tútin shyqqan. Túngi aýysymdaǵy jumysshylar jer betine evakýatsiialanyp, keiin shahtaǵa taý-ken qutqarýshylary túsken.
"Zardap shekkender joq. Burǵylaý qondyrǵysy zaqymdanǵan. Aldyn ala málimet boiynsha tútin shyǵýyna elektr kabeli zaqymdanýy sebep bolýy múmkin", - dep habarlady KAZ Minerals ókilderi.
Oqiǵanyń naqty sebebi áli anyqtalyp jatyr.
9 tamyzda kompaniianyń taǵy bir nysanynda tótenshe jaǵdai boldy. Túski ýaqytta Aqtoǵai ken ornyndaǵy №1 baiytý fabrikasynda ýchaske órtengen. Oqiǵa kezinde nysanda merdiger uiym qyzmetkerleri josparly jóndeý jumystaryn júrgizip jatqan.
Ýchaskeden 20 adam evakýatsiialandy. Aldyn ala málimet boiynsha eshkim zardap shekpegen jáne tútin áserinen meditsinalyq kómekke júginbegen. Ashyq jalyn tolyq sóndirilgen. Oqiǵanyń sebepterin anyqtaý úshin arnaiy komissiia qurylǵan.
KAZ Minerals quramyna Bozshakól jáne Aqtoǵai kenishteri, Shyǵys Qazaqstandaǵy úsh jerasty kenishi, Qyrǵyzstandaǵy Bozymshaq altyn-mys kenishi jáne Reseidegi Baimskoe ken orny kiredi. Kompaniianyń eń iri aktsioneri - qazaqstandyq kásipker Vladimir Kim.
