Saiasatker Ǵalymjan Jaqiianov Almatyda ózine qatysty qylmystyq is qozǵalǵanyn aitty, - dep habarlaidy Dalanews.kz.
Jaqiianov bul joly da másele Tólen Toqtasynovpen aradaǵy daýdan shyqqanyn jazdy.
"Osyǵan deiin Tólen Toqtasynov ekeýimizdiń aramyzdaǵy iskerlik daýdyń (onyń bastamasymen) qoǵamdyq ortaǵa shyǵyp, arty sot otyrystaryna ulasqany týraly jazǵanmyn.
Máseleniń qysqasha mán-jaiy bylai: bir kezderi óz basyndaǵy qaryzdarymen qarjylyq jaýapkershilikti Toqtasynov maǵan júkteýge tyrysty. Ókinishke qarai, onyń bul áreketke barýyna uzaq jylǵy dostyǵymyz da kedergi bola almady. Ol maǵan jala jabýmen, azamattyq sotqa júginýmen shektelmedi", - deidi Jaqiianov.
Pavlodar oblysynyń burynǵy ákimi bolǵan Jaqiianovtyń aitýynsha, Toqtasynov 2022 jyly da Mońǵoliia politsiiasyna aryz jazǵan. Bul kezde quqyq qorǵaý organdary barlyq mán-jaidy tekserip, Jaqiianovty jaýapqa tartýǵa negiz tappai, kerisinshe, Toqtasynovtyń ózine qatysty qylmystyq is qozǵapty. Osydan keiin ol Mońǵoliiadan ketýge májbúr bolǵan. Qazir oǵan izdeý salynǵan.
"Kúni keshe taǵy bir jait estidim. Tólen Toqtasynov byltyr Almatynyń Bostandyq aýdandyq politsiiasyna da dál sondai aryzben júginipti. Ondaǵylar da meniń is-áreketimde qylmys quramy bolmaýyna bailanysty maǵan qatysty is qozǵaýdan bas tartady. Alaida biylǵy jyldyń 1 aqpanynda Almaty qalasy prokýrory S.Káripbekov ol sheshiminiń kúshi joiylyp, Toqtasynovtyń aryzy boiynsha tergeý bastalǵanyn habarlapty.
Osylaisha, "Jańa ádiletti Qazaqstanda" maǵan qarsy jańa qylmystyq is qozǵaldy. Qazaqstan azamattary arasyndaǵy jeke daýǵa qala prokýrorynyń aralasýy kem degende kúmán týdyrady.
Ásirese, QR Bas Prokýrorynyń prokýratýra ókilderine iskerlik daýlarǵa aralasýǵa tyiym salatyn resmi nusqaýy bar ekenin eskersek, bul múldem oiǵa qonbaidy.
Sondyqtan osy iste ne jemqorlyq, ne saiasi astary bar dep sanaimyn. Ekeýiniń naqty qaisysy ekenin aldaǵy ýaqyt kórseter", - dep jazdy Jaqiianov.
Tólen Toqtasynov pen Ǵalymjan Jaqiianov - burynnan jaqsy aralasqan tulǵalar, tipti birge jumys istegen. Keiin oppozitsioner retinde de kózge túsken. Alaida araǵa jyldar salǵan soń eki dostyń arasynan qara mysyq ótken.
