Elordada qaladaǵy avtosalondardyń birinde satý jónindegi menedjer bolyp jumys istegen er adam paidakúnemdik maqsatta aldaý jáne senimge qiianat jasaý arqyly qala turǵyndaryna tiesili eki avtokólikti zańsyz iemdengen, dep habarlaidy dalanews.kz.
Jábirlenýshiler ózderine tiesili «Changan CS55 Plus» jáne «Toyota Camry» avtokólikterin ári qarai satý úshin avtosalonǵa tapsyrǵan. Keiin er adam kólik ielerine avtokólikterge satyp alýshy tabylǵanyn aityp, aqshasy birneshe kún ishinde aýdarylatynyna sendirip, kólikterdi úshinshi tulǵanyń atyna qaita rásimdeýge kóndirgen.
Avtokólikter qaita rásimdelgennen keiin sottalýshy olardy satýdan túsken aqshalai qarajatty óz qalaýynsha jumsaǵan. Zańǵa qaishy áreketterdiń saldarynan jábirlenýshilerge jalpy somasy 23 mln teńge kóleminde materialdyq zalal keltirilgen.
Memlekettik aiyptaýshy sotta sottalýshynyń kinásin tolyq dáleldeitin jetkilikti aiǵaqtardy usyndy. Sot otyrysynda ol óz kinásin tolyq moiyndap, jasaǵan isine ókinish bildirdi. Sot úkimimen sottalýshy kináli dep tanylyp, oǵan 3 jyl 4 ai merzimge bas bostandyǵynan aiyrý jazasy taǵaiyndaldy.
Jábirlenýshilerdiń materialdyq zalaldy óndirý týraly azamattyq talaptary qanaǵattandyryldy. Sot úkimi zańdy kúshine endi.
Qala prokýratýrasy menshikke qarsy qylmystar jasaǵany úshin múlki tárkilenip, 7 jylǵa deiin bas bostandyǵynan aiyrý jazasyna deiin qylmystyq jaýaptylyqtyń kózdelgenin eske salady jáne azamattardy zań talaptaryn saqtaýǵa shaqyrady.
