Almaty oblysy ákiminiń orynbasary Áset Masabaev «Eco Park Alatau» turǵyn úi kesheni aýmaǵynda kóshpeli keńes ótkizip, qurylys kompaniiasy jáne jergilikti atqarýshy organdarmen úleskerler máselesin sheshý joldaryn talqylady, dep habarlaidy Dalanews.kz
Josparlanǵan tórt turǵyn úidiń ekeýi áli aiaqtalmaǵan. Qurylys salýshy men úleskerler arasynda tek niet hattamalaryna qol qoiylǵany anyqtaldy, bul qosymsha zańdyq qiyndyqtar týǵyzady.
Áset Masabaev qurylys jumystary zań aiasynda aiaqtalýy tiis ekenin atap ótti. Qurylys kompaniiasy turǵyn úilerdiń qurylysyn aiaqtap, olardy paidalanýǵa berý mindetin óz moinyna aldy. Ákimdik óz tarapynan injenerlik infraqurylym boiynsha qajetti qoldaý kórsetedi, alaida qurylysty aiaqtaý qurylys kompaniiasynyń jaýapkershiliginde qalady.
2023 jyldyń jeltoqsanynda bekitilgen Janaturmys aýylynyń Bas josparyna sáikes, keshen aýmaǵy kópqabatty turǵyn úiler, taýnhaýstar jáne mektep salýǵa arnalǵan.
Jumys kezdesýi barysynda Áset Masabaev qurylys jumystaryn oryndaý boiynsha jol kartasyn ázirlep, bekitýdi, sondai-aq olardyń iske asyrylý kestesin aiqyndaýdy tapsyrdy.
Úleskerlermen ashyq dialog ornatyp, baqylaýdy qamtamasyz etý maqsatynda ár apta saiyn jiyn ótkizý týraly sheshim qabyldandy. Bul kezdesýlerde jol kartasynyń oryndalý barysy men jobany iske asyrýǵa qatysty ózekti máseleler talqylanatyn bolady.
