Biylǵy jyly «Diplommen aýylǵa» qazaqstandyq baǵdarlamasynyń alǵashqy qatysýshylary Qaraǵandy oblysy Shet aýdanynyń turǵyndary boldy. Bul mektep muǵalimderi men balabaqsha tárbieshileri. Olardyń barlyǵy jas mamandar.
Respýblikalyq joǵary oqý oryndarynda bilim alyp, diplom alǵan ýniversitet túlekteri óz bilimderin shaǵyn aýyl turǵyndaryna jetkizý úshin týǵan aýyldaryna oraldy.
Shet aýdanynda 6 adam alǵashqy zaemdaryn aldy. Olardyń qatarynda Qaiyrjan Tleýqabylov ta bar. 2019 jyly óz ólkesine oralǵan maman 4 jyldan beri Jambyl Aqylbaev atyndaǵy mektepte qazaq tili men ádebiet pánderinen sabaq berip keledi.
- Bul baǵdarlama jas mamandarǵa zor múmkindik. Sonyń arqasynda baspana alyp, otbasy qurýdy josparlap otyrmyn. Kópqabatty úiden páter tańdap aldym. Sharttary da qolaily eken. Osyǵan deiin ata-anamnyń úiin panalap keldim. Endi jýyrda óz baspanama kóshemi, - deidi Qaiyrjan Tleýqabylov.
Biylǵy jyldan bastap Otbasy bank «Diplommen aýylǵa» baǵdarlamasynyń operatory boldy.
Joba turǵyn úi satyp alýǵa nemese salýǵa zaem berýdi qarastyrady. Nesieniń eń joǵarǵy somasy 1500 AEK-ke deiin, nesie mólsherlemesi 0,01% (JTSM – 0,01% bastap). Sondai-aq, baǵdarlama aiasynda aýyldarda kóterme járdemaqy tóleý qarastyrylǵan.
Azamattardyń ýaqytyn únemdep, memlekettik qoldaýdy alý barysyn jedeldetý úshin «Diplommen aýylǵa» jobasy tsifrlyq formatqa kóshirildi. Bul - protsesti ashyq etip, biýrokratiiany azaityp, zaem alý jyldamdyǵyn arttyrdy. Buryn nesieni rásimdeý 18 kúnge sozylsa, qazir bul jumys 8 kúnge deiin qysqardy.
Qazaqstandyqtardyń ótinishteri otbasybank.kz jyljymaityn múlik portalynda onlain rejiminde qabyldanady.
Biylǵy jyly baǵdarlama boiynsha 20 mlrd teńge bólindi.
Qazirdiń ózinde barlyq aimaqtardaǵy qatysýshylardan 4000 astam ótinim qabyldandy. Al alǵashqy 1000 aýyl turǵyny nesie alyp, jeke baspana satyp aldy.
Ótinishterdiń basym bóligi - Túrkistan, Batys Qazaqstan, Mańǵystaý jáne Almaty oblystarynyń aýyl turǵyndarynan túsken.
Sondai-aq kóterme járdemaqy tóleýge 4145 ótinish qabyldandy.
Baǵdarlamaǵa kez kelgen jastaǵy qazaqstandyqtar qatysa alady. Eń bastysy, olardyń qolynda diplomy bar, birqatar mamandyqtar boiynsha qyzmet isteýleri qajet. Bul densaýlyq saqtaý, bilim berý, áleýmettik qamsyzdandyrý, mádeniet, sport, agroónerkásiptik keshen mamandary, aýyldyq okrýgter ákimderi apparattarynyń memlekettik qyzmetshileri (ákimder men ákimderdiń orynbasarlaryn qospaǵanda).
Aýdandyq ákimdikter men oblystyq mańyzy bar qalalardyń ákimdikteri jyl saiyn óz eldi mekeninde joǵaryda atalǵan mamandyqtar boiynsha talap etiletin qyzmetkerlerdiń tizbesin qalyptastyratynyn atap ótken mańyzdy. Dál osy tizim aiasynda memlekettik qoldaý jasalady.
Zaem maman jumys isteitin eldi mekende turǵyn úi satyp alýǵa nemese salýǵa beriledi. Nesieniń maksimaldy merzimi – 15 jyl. Negizgi shart – jobaǵa qatysýshy óz mamandyǵy boiynsha aýyldyq jerde 3 jyl jumys isteýi kerek.
