Májilis saǵatynda aqyly bilim, ýniversitetterdiń jaýapkershiligi jáne grant saiasatyna qatysty máseleler kóterilip, Ǵylym jáne joǵary bilim ministri Saiasat Nurbek depýtattardyń suraqtaryna jaýap berdi, dep habarlaidy Dala News.
Depýtattar sońǵy jyldary túrli qysqa merzimdi kýrstar men koýchingterge qatysty shaǵymdardyń kóbeigenin aityp, osyǵan uqsas jaǵdai joǵary oqý oryndarynda da bar ekenin atap ótti. Olardyń aitýynsha, stýdentter oqý úshin qomaqty qarjy jumsaidy. Bir kýrsqa keminde 1,5 mln teńge tólese, tórt jylda bul soma shamamen 6 mln teńgege jetedi. Al jataqhana, tamaq jáne basqa shyǵyndardy qosqanda jalpy shyǵyn 10 mln teńgeden asady. Soǵan qaramastan, keibir túlekter oqý bitirgen soń jumys taba almaidy.
Osyǵan bailanysty depýtattar ýniversitetterdi sotqa berý tájiribesi bar ma, oqý aqysyn qaitarý múmkin be jáne jumysqa ornalastyrý jaýapkershiligi kimge júktelýi tiis degen suraq qoidy.
Ministr aldymen formaldy emes bilim berý salasyna toqtaldy. Onyń aitýynsha, túrli kýrstar men koýchingter baǵytynda naqty retteý jetispeidi.
«Qazir bul salada tártip kerek. Bilimi men tájiribesi rastalmaǵan adamdar kóbeiip ketti. Kóp elderde mundai qyzmet qatań baqylanady. Biz bul baǵyttaǵy zańnamalyq ózgeristerdi qoldaimyz», dedi Nurbek.
Al ýniversitetterge qatysty ol olardyń qyzmeti zańmen retteletinin aitty.
«Jeke ýniversitetter bilim týraly zańmen jáne kásibi kodekspen jumys isteidi. Biz oqý baǵdarlamalarynyń sapasyn arnaiy komitet arqyly baqylaimyz», dedi ministr.
Sonymen qatar Nurbek sońǵy jyldary memlekettik baqylaý tásili ózgergenin atap ótti. Buryn joǵary oqý oryndary turaqty tekserilip, qatań baqylaýda bolǵan.
«Buryn jyl saiyn tekserýler júrgiziletin. Qazir bul format ózgerdi. Jańa retteýshi saiasat engizildi», dedi ol.
Ministrdiń aitýynsha, qazirgi modelde memleket burynǵydai tolyq baqylaýshy emes. Ýniversitetterge kóbirek akademiialyq erkindik berilgen, biraq jaýapkershilik te soǵan sai kúsheigen.
«Burynǵydai tolyq baqylaý júrgizetin múmkindik joq. Bul sanaly túrde qabyldanǵan sheshim», dedi Nurbek.
Jumysqa ornalasý máselesine qatysty ministr diplom eńbek naryǵynda avtomatty túrde jumysqa kepildik bermeitinin aitty.
Onyń sózinshe, bul jerde jaýapkershilik birneshe tarapqa bailanysty. Ýniversitet bilim beredi, stýdent óz daǵdylaryn damytýy kerek, al eńbek naryǵy suranysqa qarai jumys oryndaryn usynady.
Osylaisha, Májilistegi talqylaýda joǵary bilim júiesinde baqylaý formaty ózgergeni, al tolyq grant pen jumysqa kepildik berý modeli birtindep qaita qaralyp jatqany aityldy.
