8 qarasha kúni Barselonanyń áigili Olimpiialyq arenasy – Olimpic Arena Badalona myńdaǵan jankúierlerge toldy. Olar Qazaqstannyń halyq ártisi Dimash Qudaibergenniń Ispaniiadaǵy tuńǵysh jeke kontsertin asyǵa kútýmen boldy, dep habarlaidy Dalanews.kz.
Kórermender «Ole, Dimash, Ole!» dep urandatyp, óz klýbtarynyń tústerindegi kiimmen «tolqyn» jasap, sahnaǵa shyǵatyn súiikti ártisterin shat kóńilmen qarsy aldy. Sodan keiin Qazaqstan Respýblikasynyń Memlekettik ánuranymen oryndalyp, zaldaǵy kórermen oryndarynan tik turyp qurmet kórsetti.
Elegantty aq kostiýmmen sahnaǵa sándi shyqqan Dimash shoýyn birlik pen úmitke toly «Biz bárimiz altynbyz!» ánimen bastady. «O, Qudai-aý, sizderdiń energiialaryńyz úshin úlken raqmet!» – dep yqylasyn bildirgen ol kórermenderdi ózine birden baýrap aldy. Buǵan deiin Maikl Djordan syndy álem juldyzdary óner kórsetken bul sahnada Dimashtyń energetikasy burynǵydan da jarqyrai tústi.
Dimash kórermenderin qazaq, aǵylshyn tilderinde ǵana emes, sondai-aq ispan tilinde de jyly qarsy aldy:
«Barshańyzǵa qaiyrly kesh! Bul – Ispaniiadaǵy meniń alǵashqy kontsertim. Osynda sizdermen birge bolý – men úshin úlken qurmet. Barlyǵyńyzǵa kóp raqmet!»
Zalda otyrǵan Dears pen Dimash arasyndaǵy emotsionaldy bailanys bir sátke de úzilgen joq. Ánshi árbir úzilis saiyn kórermenderge jyly jymiyp, súiispenshilik belgisi retinde ystyq yqylasyn joldap otyrdy. Al, kórermender ánshiniń bul yqylasyna uzaq qoshemet kórsetti.
Dimash kontsert barysynda improvizatsiialyq karaokege qatysyp, kórermendermen tikelei sóilesip otyrdy. Ol sahnanyń biigine de, shetine de erkin qozǵalyp, ár jankúierge múmkindiginshe jaqyn bolýǵa tyrysty.
Zalda qazaqtyń ulttyq kiimin kigen jas qyzdy baiqap qalǵan Dimash ony sahnaǵa shaqyrdy. 15 jastaǵy jas ánshi Janel Ali súiikti ártisimen birge «Umytylmas kún» ánin oryndady.
Keshtiń eń áserli tustarynyń biri – Dears jankúierleriniń «Elegimos la Vida» («Biz ómirdi tańdaimyz») aktsiiasy boldy. Dimash «The Story of One Sky» rekviemin oryndap turǵan sátte, kórermender aq qolǵaptaryn joǵary kóterip, beibitshilik pen úmittiń, tazalyqtyń simvolyn kórsetti.
Dimashtyń «Stranger» atty álemdik týry jalǵasýda. Jaqyn arada Dimash pen onyń komandasy London men Berlinde jankúierlerimen qaita júzdesedi.
