Dýbaida A Dubai Invite atty jańa baǵdarlama iske qosyldy. Onyń aiasynda BAÁ azamattary men rezidentteri shetelden dostary men týystaryn shaqyrǵany úshin quny 3 myń dirhamnan (shamamen 380 myń teńge) asatyn bonýs paketterine ie bolady. Alaida bul aqshalai tólem emes, seriktes kompaniialar usynatyn jeńildikter, sertifikattar jáne túrli arnaiy usynystar, dep habarlaidy dalanews.kz.
Baǵdarlamany Dýbaidyń Ekonomika jáne týrizm departamenti (Dubai Department of Economy and Tourism, DET) tanystyrdy. Joba dostar men týystarǵa qonaqqa barýǵa negizdelgen VFR-týrizmdi (Visiting Friends and Relatives) damytýǵa baǵyttalǵan.
Vedomstvonyń málimetinshe, baǵdarlama Dýbai turǵyndary men azamattaryna shetelde turatyn dostary men týystaryn shaqyrýǵa múmkindik beredi. Qonaqtyń emiratqa kelgeni rastalǵannan keiin shaqyrýshyǵa DET usynatyn arnaiy bonýs paketi beriledi.
Sonymen qatar, departament A Dubai Invite baǵdarlamasy lotereia, baiqaý nemese utys oiyny emes ekenin atap ótti. Sondai-aq baǵdarlama qonaqtardyń áýe biletterin, qonaqúi shyǵyndaryn nemese vizasyn tóleýdi qarastyrmaidy.
Baǵdarlamaǵa kimder qatysa alady?
Baǵdarlamaǵa 18 jasqa tolǵan, jaramdy Emirates ID qujaty bar BAÁ azamattary men rezidentteri qatysa alady. Ol úshin arnaiy onlain-forma arqyly keletin qonaqtardyń derekterin olardyń Dýbaiǵa kelýine deiin aldyn ala tirkeý qajet.
Shaqyrylǵan qonaqtar birneshe talapqa sai bolýy tiis. Olar BAÁ rezidenti bolmaýy kerek jáne 2026 jylǵy 20 shilde men 31 qazan aralyǵynda týristik vizamen, vizasyz rejim arqyly nemese elge kelgen kezde rásimdeletin vizamen Dýbaiǵa kirýi qajet. Emiratqa ushaqpen, teńiz nemese qurlyq jolymen kelýge bolady.
DET baǵdarlama vizany rásimdeýdi qamtymaitynyn málimdedi. Sondyqtan barlyq qajetti qujattardy rásimdeý men sapar shyǵyndaryn týrister ózderi kóteredi.
Baǵdarlama qalai jumys isteidi?
Qonaq Dýbaiǵa kelgennen keiin qatysýshylarǵa onyń kelgeni týraly qosymsha habarlaýdyń qajeti joq. Bul aqparat memlekettik júieler arqyly avtomatty túrde rastalady.
Baǵdarlama sharttaryna sáikes, qonaqtardyń kelýi rastalǵannan keiin 72 saǵat ishinde qatysýshynyń elektrondyq poshtasyna bonýstardy alý jónindegi nusqaýlyq jiberiledi. Al bonýs paketterin taratý 2026 jyldyń tamyz aiynan bastalady.
Bir ótinimde birden bes adamǵa deiin tirkeýge bolady. Eger qonaqtar sany odan kóp bolsa, qosymsha ótinim jiberýge múmkindik bar.
Qandai bonýstar beriledi?
Árbir bonýs paketiniń quny 3 myń dirhamnan asady. Onyń quramyna qonaqúiler, meiramhanalar, týristik nysandar men túrli servisterdiń arnaiy usynystary kiredi.
Baǵdarlama seriktesteriniń qatarynda W Dubai Mina Seyahi, The Westin Dubai Mina Seyahi, Le Méridien Mina Seyahi Beach Resort & Waterpark, Meliá Desert Palm, IHG Hotels & Resorts, Careem jáne Hala bar. Usynylǵan bonýstar, eger jekelegen usynystarda basqa merzim kórsetilmese, 2026 jylǵy 31 jeltoqsanǵa deiin jaramdy bolady.
Qandai shekteýler bar?
Baǵdarlamada birqatar shekteýler qarastyrylǵan. Bir turǵyn bir ýaqytta eń kóbi bes qonaqty tirkei alady. Alaida shaqyrylǵan adamdardyń sanyna qaramastan, baǵdarlama kezeńinde bir qatysýshyǵa eń kóbi úsh bonýs paketi ǵana beriledi.
Sondai-aq bir týristi baǵdarlamaǵa tek bir ret tirkeýge bolady. Eger ony basqa qatysýshy buryn tirkegen bolsa, qaitalanǵan ótinim esepke alynbaidy.
Budan bólek, ótinimde kórsetilgen toptan keminde bir adamnyń Dýbaiǵa kelýi qatysýshyǵa bonýs alýǵa jetkilikti.
Neni bilý mańyzdy?
DET ókilderi baǵdarlama sapar shyǵyndaryn ótemeitinin taǵy bir márte eske saldy. Áýe biletteri, qonaqúi, kólik, viza jáne basqa da barlyq shyǵyndardy týrister ózderi tóleidi. Sondai-aq departament viza berýden nemese elge kirýge ruqsat berýden bas tartylǵan jaǵdaida jaýapkershilik kótermeidi.
Sonymen qatar, bonýstar qoljetimdiligine qarai usynylady jáne olardyń quramyna seriktes kompaniialardyń usynystary engiziledi. Uiymdastyrýshylar kez kelgen ýaqytta qoljetimdi usynystar tizimin, baǵdarlama sharttaryn ózgertýge nemese baǵdarlamany aldyn ala eskertýsiz toqtatýǵa quqyly.
