Kaspii qubyr konsortsiýmy 2025 jyly munai tasymaldaý boiynsha rekordtyq kórsetkishke jetti. Kompaniia nysandaryna drondar shabýyl jasaǵanyna qaramastan, jyl qorytyndysy boiynsha 70,5 mln tonna munai jóneltilgen., dep habarlaidy dalanews.kz.
Bul týraly «KTK-R» AQ bas direktory Nikolai Gorban málimdedi. Onyń aitýynsha, 2026 jyly munai tasymaldaý kólemi 72 mln tonnaǵa deiin ósýi múmkin.
Rekordqa Qazaqstandaǵy munai ken oryndary áser etken
Nikolai Gorban tasymal kóleminiń artýyna Qazaqstandaǵy iri ken oryndaryndaǵy óndiristiń ósýi sebep bolǵanyn aitty.
«2025 jyly tasymal kólemi 70,5 mln tonna boldy. Al 2024 jyly bul kórsetkish 63 mln tonna bolǵan. Buǵan Qazaqstandaǵy Teńiz, Qarashyǵanaq jáne Qashaǵan ken oryndaryndaǵy munai óndirý kóleminiń artýy áser etti», – dedi ol.
Onyń sózinshe, júieniń tehnikalyq múmkindigi men 2014 jyldan beri kezeń-kezeńimen júrgizilgen keńeitý jobalary rekordtyq kólemge qol jetkizýge múmkindik bergen.
KQK importtyq jabdyqtardan bas tartpaq
Kompaniia basshysy sanktsiialar jaǵdaiynda negizgi basymdyqtardyń biri importty almastyrý bolǵanyn atap ótti. Onyń aitýynsha, KQK sheteldik magistraldy sorǵy agregattary, gaztýrbinalyq qondyrǵylar men elektr qozǵaltqyshtarynan birtindep bas tartyp jatyr.
«Bul sheshim birqatar sheteldik kompaniialardyń Resei naryǵynan ketýine jáne importty almastyrý qajettiligine bailanysty qabyldandy», – dedi Gorban.
Ol kompaniianyń maqsaty – óndiristi tolyqtai jergiliktendirý ekenin aitty. Iaǵni jobalaýdan bastap jabdyq shyǵarýǵa deiingi barlyq protsess otandyq tehnologiialar men baǵdarlamalyq qamtamasyz etýge negizdelmek.
KQK reseilik basqarý júiesine kóship jatyr
Qazir KQK nysandarynda sheteldik SCADA júiesinen reseilik dispetcherlik baqylaý jáne basqarý júiesine kóshý jumystary júrgizilip jatyr. Kompaniia muny tehnologiialyq táýelsizdik pen kiberqaýipsizdikti kúsheitý úshin qajet dep túsindirdi.
Kompaniia jylyna 80 mln tonnadan astam munai tasymaldaýǵa daiyn
Nikolai Gorban KQK tehnikalyq turǵydan jylyna 80 mln tonnadan astam munai jóneltýge daiyn ekenin aitty.
«Biz áldeqashan jylyna 80 mln tonnadan astam munai tasymaldaýǵa tehnikalyq jaǵynan daiynbyz. Biraq josparlarǵa aýa raiy men júk jóneltýshilerdiń sheshimderi áser etedi», – dedi ol.
Kompaniia basshysy 2026 jyly qolaily jaǵdai bolsa, tasymal kólemi keminde 72 mln tonna bolady dep kútetinin aitty. Qazirgi ýaqytqa deiin onyń 23 mln tonnadan astamy jóneltilgen.
KQK biyl 30 jyldyǵyn atap ótedi
2026 jyl Kaspii qubyr konsortsiýmy úshin mereitoily jyl bolmaq. 6 jeltoqsanda kompaniia qazirgi formatta qurylǵanyna 30 jyl tolady.
