Almaty qalasy ákimi Erbolat Dosaev Medeý aýdany turǵyndarymen kezdesýinde «Samal-2» shaǵyn aýdanynyń turǵyny Snegin kóshesinde 15 jyldan astam ýaqyt boiy kóp deńgeili parking qaraýsyz qalyp, ol qańǵybas itterdiń panalaityn jerine ainalǵanyn aita kele, ákimnen qaraýsyz qalǵan qurylys nysanyn buzýdy nemese qandaida bir kádege jaratýdy surady.
– Kóterip otyrǵan máseleńiz óte oryndy. Ákimdik bul máseleni sheshý joldaryn qarastyrýda. Esterińizde bolsa, men qalada kóp deńgeili parkingterdi damytý boiynsha tapsyrma bergen bolatynmyn.
Búginde osy is boiynsha birqatar nysandardy satyp alý úshin baǵasyn kelsip jatyrmyz. Aǵymdaǵy jyly bizde qarjylyq múmkindikter bolmaidy. Biraq 2024 jylǵa arnalǵan biýdjetti qalyptastyrý kezinde men turǵyndarǵa yńǵaily bolý úshin olardy kópdeńgeili parkingterge ainaldyrý úshin satyp alýǵa nemese qurylysty aiaqtaýǵa bolatyn barlyq oryndardy qaraýǵa tiisti tapsyrma berdim.
«Samal» shaǵyn aýdany boiynsha qosymsha tapsyrma beremin. Bul – joba qanshaǵa baǵalanatynyn kóreiik. Sol jerde yńǵailyq ári durys parking salýdy qarastyrǵan jón. Siz durys baiqaǵansyz, eski kópdeńgeili parking burynnan tur. Biz ony jasai alamyz ba álde buzý kerek pe ony mamandarmen anyqtaýymyz kerek, – dep óz oiyn aitty qala ákimi.
