Djennifer Lopestiń sahnalyq kostiýmderi jaily pikir bildirgen Astana Máslihatynyń depýtaty Sáýle Samidin qoǵamnyń qyzý talqysyna tústi. Ol jaqynda elordada ótken amerikalyq pop-juldyzdyń kontsertine qatysty Threads áleýmettik jelisindegi jazbasynda ánshiniń kiimi tym ashyq bolǵanyn aityp, qazaqstandyqtardyń nazaryn aýdardy, habarlaidy Dalanews.kz.
"Kópshilik JLO-nyń ashyq kiimderine nazar aýdardy. Tipti 16 jastaǵy qyzym Ámirlikterde ánshiniń mádenietti qurmettep, jabyq kiingenin aitty. Árine, biz BAÁ emespiz, ózimizdiń qundylyqtarymyz bar. Biraq bizdiń de mentalitetimiz bar, kei obrazdardy jergilikti aýditoriiaǵa beiimdegeni durys bolar edi. JLO ózindik stili bar juldyz ekeni ras. Biraq bul jaǵdai - jastardyń mundai dúnielerdi qalai qabyldaityny jóninde oilanýǵa sebep", – dep jazdy depýtat.
Alaida onyń bul pikiri áleýmettik jeli qoldanýshylarynyń syn-eskertpesine ulasty. Kópshilik Sáýle Samidinniń eldegi mańyzdy máselelerge emes, ánshiniń kiimine nazar aýdarǵanyn orynsyz dep sanady.
"Qurmetti Sáýle hanym! Máslihat tóraǵasy retinde sizden eldiń shynaiy máselelerine kóńil bólýdi suraimyz: áielderdiń quqyqtaryn qorǵaý, alaiaq qurylys kompaniialarymen kúres, aliment tóleýden jaltarǵan ákelerge qatysty sharalar, jol sapasy men infraqurylymdaǵy jemqorlyq syndy mańyzdy taqyryptar nazardan tys qalmaýǵa tiis", – dep jazdy jeli qoldanýshylary.
Aita keteiik, Sáýle Samidin 2023 jylǵy naýryzdan beri Astana qalasy Máslihatynyń depýtaty jáne Áleýmettik-mádeni damý jónindegi turaqty komissiianyń tóraǵasy qyzmetin atqarady. Sonymen qatar, Astana isker áielder keńesin basqarady jáne AMANAT partiiasynyń múshesi. Ol - "Eren eńbegi úshin" medaliniń iegeri.
Eske salaiyq, 1 tamyzda Astana Arenada amerikalyq ánshi Djennifer Lopes óziniń Up All Night atty álemdik týrynyń aiasynda qazaqstandyq kórermender aldynda alǵash ret óner kórsetti.
