دجەننيفەر لوپەستىڭ ساحنالىق كوستيۋمدەرى جايلى پىكىر بىلدىرگەن استانا ءماسليحاتىنىڭ دەپۋتاتى ساۋلە ساميدين قوعامنىڭ قىزۋ تالقىسىنا ءتۇستى. ول جاقىندا ەلوردادا وتكەن امەريكالىق پوپ-جۇلدىزدىڭ كونسەرتىنە قاتىستى Threads الەۋمەتتىك جەلىسىندەگى جازباسىندا ءانشىنىڭ كيىمى تىم اشىق بولعانىن ايتىپ، قازاقستاندىقتاردىڭ نازارىن اۋداردى، حابارلايدى Dalanews.kz.
"كوپشىلىك JLO-نىڭ اشىق كيىمدەرىنە نازار اۋداردى. ءتىپتى 16 جاستاعى قىزىم امىرلىكتەردە ءانشىنىڭ مادەنيەتتى قۇرمەتتەپ، جابىق كيىنگەنىن ايتتى. ارينە، ءبىز ءباا ەمەسپىز، ءوزىمىزدىڭ قۇندىلىقتارىمىز بار. ءبىراق ءبىزدىڭ دە مەنتاليتەتىمىز بار، كەي وبرازداردى جەرگىلىكتى اۋديتورياعا بەيىمدەگەنى دۇرىس بولار ەدى. JLO وزىندىك ءستيلى بار جۇلدىز ەكەنى راس. ءبىراق بۇل جاعداي - جاستاردىڭ مۇنداي دۇنيەلەردى قالاي قابىلدايتىنى جونىندە ويلانۋعا سەبەپ"، – دەپ جازدى دەپۋتات.
الايدا ونىڭ بۇل پىكىرى الەۋمەتتىك جەلى قولدانۋشىلارىنىڭ سىن-ەسكەرتپەسىنە ۇلاستى. كوپشىلىك ساۋلە ءساميديننىڭ ەلدەگى ماڭىزدى ماسەلەلەرگە ەمەس، ءانشىنىڭ كيىمىنە نازار اۋدارعانىن ورىنسىز دەپ سانادى.
"قۇرمەتتى ساۋلە حانىم! ءماسليحات ءتوراعاسى رەتىندە سىزدەن ەلدىڭ شىنايى ماسەلەلەرىنە كوڭىل ءبولۋدى سۇرايمىز: ايەلدەردىڭ قۇقىقتارىن قورعاۋ، الاياق قۇرىلىس كومپانيالارىمەن كۇرەس، اليمەنت تولەۋدەن جالتارعان اكەلەرگە قاتىستى شارالار، جول ساپاسى مەن ينفراقۇرىلىمداعى جەمقورلىق سىندى ماڭىزدى تاقىرىپتار نازاردان تىس قالماۋعا ءتيىس"، – دەپ جازدى جەلى قولدانۋشىلارى.
ايتا كەتەيىك، ساۋلە ساميدين 2023 جىلعى ناۋرىزدان بەرى استانا قالاسى ءماسليحاتىنىڭ دەپۋتاتى جانە الەۋمەتتىك-مادەني دامۋ جونىندەگى تۇراقتى كوميسسيانىڭ ءتوراعاسى قىزمەتىن اتقارادى. سونىمەن قاتار، استانا ىسكەر ايەلدەر كەڭەسىن باسقارادى جانە AMANAT پارتياسىنىڭ مۇشەسى. ول - "ەرەن ەڭبەگى ءۇشىن" مەدالىنىڭ يەگەرى.
ەسكە سالايىق، 1 تامىزدا استانا ارەنادا امەريكالىق ءانشى دجەننيفەر لوپەس ءوزىنىڭ Up All Night اتتى الەمدىك تۋرىنىڭ اياسىندا قازاقستاندىق كورەرمەندەر الدىندا العاش رەت ونەر كورسەتتى.
