Astanada ótetin Djennifer Lopestiń kontsertinde anshlag bolaiyn dep tur. Óitkeni biletter qysqa merzimde japa-tarmaǵai satylyp ketken. Biraq bilet satýmen ainalysqan “Tiketon” (Freedom Ticketon) platformasy birqatar máselemen betpe-bet kelgen. Al osy platforma tiesili Freedom Holding-tiń basshysy Timýr Týrlov ózderiniń paidadan góri, shash etekten shyǵynǵa batqandaryn aitady, dep habarlaidy Dalanews.kz.
"Tiketon" kontsertti uiymdastyrýshylarmen biletti taratýda agent retine tańdalyp alyndy. Árine, qyzmetimizge komissiia ýáde etildi. Sóitip biz iske kirisip kettik. Biletke degen suranys birneshe esege joǵary bolyp shyqty. Bilet satylymy kezinde kóp adam lap qoiyp, sait "jalp" etip qulady. Baza da "ketti". Osy tehnikalyq aqaýdyń kesirinen kóptegen bilet qaita satylǵan. Áriptesterimiz biletterdiń qaita satylyp jatqanyn baiqaǵanda satylymdy birden toqtatty", dep jazdy Týrlov búgin Threads-taǵy paraqshasynda.
Onyń aitýynsha, teksere kelgende qaitadan satylǵan biletter stadiondaǵy oryndardyń shamamen 10%-yn qamtypty. Sóitip "Tiketon" qyzmetkerleri birneshe kún boiy "myńdaǵan brondy keiinge shegerýmen" bolǵan.
"Nátijesinde biz qoldaǵy bar qorǵa qaramastan biletti brondaýshylardyń barlyǵyna birdei oryn taýyp bere almaitynymyzdy jaqsy túsinip otyrmyz. Biz tutynýshylarymyz aldynda aqshalai keshirim suraý kerekpiz dep sanaimyz. Bul bir aptadai ýaqytta alady", delingen holding basshysy jazbasynda.
Freedom Holding basshysynyń aitýynsha, servis mynandai birqatar sharalar qabyldady:
- bilet satyp alyp, biraq qolyna vaýcher timegen klientterimizge: ókinishke qarai, Sizderge oryn qalmady. Sondyqtan bilet aqshasyn qaitaramyz jáne týra sol somada (100%) ótemaqyny kartańyzǵa aýdaramyz. Aqsha túsetin ýaqyt - Sizdiń bankińizge bailanysty úshten 10 jumys kúnine deiin;
- eger biletińiz sol baǵadaǵy basqa orynǵa nemese bi alańyna aýystyrylsa, onda Sizge keltirilgen yńǵaisyzdyq úshin bilet qunynyń 50%-yndai qarajatty kartańyzǵa aýdaramyz;
- eger biletińiz arzanyraq orynǵa aýystyrylsa, onda aqshańyz tolyqtai qaitarylady, al ózińiz kontsertke tegin kire alasyz.
Aldaǵy ýaqytta barlyq klientterge tapsyrystyń mártebesi týraly SMS-habarlama joldanatyny da naqtylanady.
"Munyń barlyǵy bizge birneshe júz million teńge shyǵyn ákelmek. Bul sheshimimiz osy servistiń jyldyq tabysy kólemindegi qunǵa baǵalanady. Bizdiń komandamyz bul jaǵdaidan úlken sabaq alatyn bolady. Endi, biz mundai kontsertterde qandai qiyndyqtar bolatynyn jaqsylap uǵynyp aldyq", dep sózin túiindeidi Týrlov.
Aita ketsek, Djennifer Lopestyń shoýy 1 tamyzda Astanadaǵy "Astana Arena" stadionynda ótedi. Biletter satylymy 11 sáýirde saǵat 11:00-de bastaldy, alǵashqy minýttarda-aq 50 000-nan astam adam "Tiketon" saityna lap qoidy, saldarynan mundai júktemeni platformany kótere almai, "synyp" qaldy.
Freedom Ticketon - 2012 jyly iske qosylǵan kino, mádeni-oiyn-saýyq jáne sporttyq is-sharalar, týrlar, ekskýrsiialar, kontsertter biletterin onlain-satýshy qazaqstandyq júie. Kompaniianyń negizin qalaýshy - Aleksei Li men Konstantin Gorojankin. Bas keńsesi Almatyda ornalasqan, servis Qazaqstanda, Ózbekstanda, Qyrǵyzstanda jáne Tájikstanda jumys isteidi. 2022 jyldyń qyrkúieginde Freedom Holding Corp 3 mln dollarǵa "Ticketon Events" JShS-ny (Ticketon brendi) satyp aldy.
