Burynǵy Májilis depýtaty Ermurat Bapi aldaǵy Quryltai sailaýyn baqylaityn táýelsiz «Halyq úni» baqylaýshylar tobynyń jumysyna qosylǵanyn málimdedi, dep habarlaidy dalanews.kz.
Onyń aitýynsha, usynysty jýrnalist, Abai.kz portalynyń burynǵy jetekshisi Nurgeldi Ábdiǵani jasaǵan.
«Nurgeldi baýyrym habarlasyp: "Quryltai sailaýyna orai táýelsiz baiqaýshylar tobyn quryp jatyrmyz. Kelińiz, baqylaý naýqanyn uiymdastyryp kóreiik", – dep usynys aitty. Birer kún oilanyp, kelisim berdim», – dep jazdy Ermurat Bapi.
Eks-depýtattyń sózinshe, «Halyq úni» baqylaýshylar toby jumysyn bastap, alǵashqy baspasóz máslihatyn ótkizgen.
«Dos aǵa bul azamattyq naýqandy sonaý 1998 jylǵy sailaýdan bastaǵan tisqaqqan baqylaýshy. Al men 2005 jylǵy prezidenttik sailaýda "Ádiletti Qazaqstan" qozǵalysy quramynda baqylaýshylyq jasadym», – dedi ol.
Bapi qazirgi táýelsiz baqylaýshylardyń jumys isteý múmkindigi burynǵyǵa qaraǵanda áldeqaida shekteýli ekenin aitty.
«Qazirgi baqylaý toptary tap-taza jalańash entýziazmmen, ary ketse halyqaralyq uiymdardyń taqyl-tuqyl grantymen jumys isteidi. Búkil sailaýdy túgili, birer qalany baqylaýmen jabýdyń ózi ońai emes», – dedi eks-depýtat.
Soǵan qaramastan, onyń pikirinshe, qoǵam sailaýdy baqylaý protsesine belsendi aralasýy qajet.
«Qoǵam sailaýdy baqylaý protsesine meilinshe etene aralasýy kerek. Erkin, ashyq, taza sailaý azamattardyń sanaly jaýapkershiligi men belsendiligi arqyly qalyptasady», – dep jazdy Bapi.
Sondai-aq ol 2019 jylǵy prezident sailaýynan keiin belsendi bolǵan táýelsiz baqylaýshylar qozǵalysy keiin álsirep ketkenin aitty. Bapidiń sózinshe, jańadan qurylǵan «Halyq úni» baqylaýshylar toby eshbir partiianyń nemese saiasi kúshtiń múddesin kózdemeidi.
«Bizdiń baqylaýshylar úshin Quryltai sailaýyna qatysatyn jeti partiianyń bári birdei. Eshqaisysyna búiregimiz burylmaidy. Bizdiń múddemiz – tek sailaýdyń jáne daýys berýdiń tazalyǵyn baqylaý», – dep túiindedi ol.
