«SQ-Farmatsiia» JShS jańa Basqarma Tóraǵasy bolyp Asylbekov Nurlybek Ábibýllauly taǵaiyndaldy, dep habarlaidy Dalanews.kz.
«SQ-Farmatsiia» JShS-ne taǵaiyndalǵanǵa deiin Shymkent qalasynyń Densaýlyq saqtaý basqarmasyn basqardy.
Nurlybek Asylbekov 1966 jyly 24 maýsymda dúniege kelgen. 1990 jyly Almaty memlekettik meditsina institýtynyń Shymkent qalasyndaǵy filialyn; 2003 jyly M.Saparbaev atyndaǵy Ońtústik Qazaqstan gýmanitarlyq institýtyn; 2006 jyly – M.Áýezov atyndaǵy Ońtústik Qazaqstan memlekettik institýtyn bitirgen. «Provizor», «Zańger», «Ekonomist» mamandyqtary boiynsha.
Eńbek jolyn 2000 jyly Ońtústik Qazaqstan oblysy Sozaq aýdanynyń «Farmatsiia» AQ-da provizor-tehnolog jáne bas maman bolyp bastaǵan.
Buǵan deiin Májilis depýtaty Baqytjan Bazarbek Bas prokýratýraǵa aryz jazdy. Ol "SQ-Farmatsiia" JShS, Dárilik zattardy saraptaý ulttyq ortalyǵy, Biryńǵai distribiýtor jáne elimizdegi farmatsevtikalyq kompaniialardyń qyzmetine qatysty tekseris júrgizýdi surady.
Depýtattyń aitýynsha, buǵan deiin bergen ýádesinde turyp, Joǵary aýditorlyq palatanyń aýdit qorytyndysynda memleketke aitarlyqtai zalal keltirgen zańbuzýshylyqtar anyqtalǵannan keiin Bas prokýratýraǵa tórt ótinish joldamaq:
- "SQ-Farmatsiia" JShS men farmatsevtikalyq indýstriia sýbektileriniń qyzmetine qatysty;
- ÁMSQ (MÁMS) jáne meditsinalyq uiymdarǵa qatysty;
- Aýyl sharýashylyǵy salasyndaǵy sýbsidiialarǵa qatysty;
- 2024 jylǵy respýblikalyq biýdjettiń oryndalýy jónindegi Úkimet esebi boiynsha birqatar ministrlikke qatysty.
"Keshe Bas prokýratýraǵa "SQ-Farmatsiia" JShS men farmatsevtikalyq sala sýbektilerine qatysty alǵashqy ótinishim joldandy. Ótinishimdi áriptesim Murat Ábenov qoldap, birge qol qoidy. Prokýratýra organdary tarapynan farmatsevtikalyq salaǵa aýqymdy tekseris júrgiziledi, quqyq qorǵaý organdary tarapynan sotaldy tergeýler, sondai-aq, sot protsesteri bolady, qamaýǵa alynady dep kútemiz", - dedi depýtat.
Aita keteiik, buǵan deiin depýtat MÁMS-ke qatysty Bas prokýratýraǵa aryz daiyndap jatqany belgili boldy.
