Depýtattar jańa Konstitýtsiia men «Qazaqstan Respýblikasynyń Quryltaiy jáne onyń depýtattarynyń mártebesi týraly» konstitýtsiialyq zań talaptaryna sáikes ázirlengen Quryltai reglamentin qabyldady, dep habarlaidy dalanews.kz.
Reglament Quryltai depýtattarynyń qyzmetin jáne joǵarǵy zań shyǵarýshy organnyń jumysyn uiymdastyrý tártibin aiqyndaidy. Qujat buǵan deiin qoldanysta bolǵan Qazaqstan Parlamenti men onyń Palatalarynyń reglamentteri negizinde ázirlengen.
Quryltaidyń bir palataly modeli men konstitýtsiialyq ókilettikteriniń jańa júiesine bailanysty otyrystar ótkizý tártibi birizdendirilip, terminologiia jańa Konstitýtsiiaǵa sáikestendirildi.
Qujatta zań jobalaryn qaraý tártibine de eleýli ózgerister engizildi. Endi zań jobalary Quryltaida úsh oqylymda qaralady.
Birinshi oqylymda zań jobasynyń negizgi erejeleri, maqsattary men mindetteri talqylanady. Ekinshi oqylymda bas komitettiń salystyrmaly kestesine engizilgen túzetýler qaralady. Úshinshi oqylymda zań jobasynyń sońǵy redaktsiiasy Qazaqstan Konstitýtsiiasyna sáikestigi jáne quqyqtyq olqylyqtardy joiý turǵysynan qaralady.
Al halyqaralyq sharttardy ratifikatsiialaý nemese denonsatsiialaý týraly zań jobalary eki oqylymda qaralady.
Reglamentte jańa konstitýtsiialyq organ – Qazaqstan Halyq Keńesimen ózara is-qimyl tártibi de jeke qarastyrylǵan. Onyń ókilderi óz ókilettigine jatatyn máseleler boiynsha tyńdaýlarǵa, turaqty komitetterdiń jáne jumys toptarynyń otyrystaryna qatysa alady.
Sonymen qatar depýtattyq ádep normalary men Ádep jónindegi keńestiń jumysyn uiymdastyrý tártibi belgilendi.
Qujattyń qorytyndy erejeleri Quryltai jumysyn bastaǵan kezde zań shyǵarý protsesiniń úzdiksizdigin qamtamasyz etedi. Buǵan deiin Májiliske engizilgen zań jobalary jańa Reglament talaptaryna sáikes Quryltaida qarala beredi.
Osylaisha, eki palataly Parlamentten bir palataly Quryltaiǵa kóshý kezinde quqyqtyq sabaqtastyq saqtalyp, zań shyǵarý protsesin uiymdasqan túrde jalǵastyrý kózdelip otyr.
