Qazaqstanda ul balalarǵa adam papillomasy virýsyna (VPCh) qarsy erikti túrde vaktsina egý qajet. Bul týraly Májilis depýtaty Ashat Aimaǵambetov málimdedi, dep habarlaidy Dalanews.kz.
Onyń aitýynsha, ata-analar ózderi ul balalarǵa arnalǵan VPCh ekpesin engizýdi surap, depýtattarǵa júginip jatyr. Osyǵan bailanysty Májilis depýtattary Densaýlyq saqtaý ministrligine usynys joldaǵan.
Ashat Aimaǵambetovtiń sózinshe, kóptegen elde VPCh-ǵa qarsy ekpe uldarǵa da, qyzdarǵa da birdei salynady.
«Sol sebepti biz bul vaktsinany erikti túrde qoljetimdi etý qajet degen usynys aittyq. Qazir ekpeni dárihanadan tabý óte qiyn. Sondyqtan memleket tarapynan barlyq nietti azamattar úshin qoljetimdilikti qamtamasyz etý mańyzdy. Biz Densaýlyq saqtaý ministrligi bul bastamany qoldaidy dep úmittenemiz. Sebebi ul balalar da qaýip tobynda. Olardyń densaýlyǵy nazardan tys qalmaýy kerek», – dedi depýtat.
Ol qazirgi kezde Qazaqstanda qyz balalarǵa VPCh-ǵa qarsy ekpe tegin salynatynyn jáne bul – myńdaǵan adamnyń ómirin saqtaýǵa múmkindik beretin úlken qadam ekenin atap ótti.
«Biz endi osy tájiribeni keńeitýdi usynamyz. VPCh – tek “áielderge tán virýs” emes. Bul virýs jatyr moiny qaterli isigin ǵana emes, sonymen birge kómei, aýyz qýysy jáne tik ishek qaterli isigin de týdyrýy múmkin, onyń ishinde erlerde de», – dep jazdy Aimaǵambetov óziniń Telegram-arnasynda.
Buǵan deiin, ótken aptada, Densaýlyq saqtaý ministri Aqmaral Álnazarova Qazaqstanda VPCh-ǵa qarsy ekpe alýshylar tizimi keńeiýi múmkin ekenin aitqan bolatyn. Onyń málimetinshe, ministrlik ul balalar men 18 jastan asqan azamattarǵa erikti túrde ekpe egý múmkindigin qarastyryp jatyr. Vaktsinatsiia tek erikti túrde júrgiziledi.
