قازاقستاندا ۇل بالالارعا ادام پاپيللوماسى ۆيرۋسىنا (ۆپچ) قارسى ەرىكتى تۇردە ۆاكسينا ەگۋ قاجەت. بۇل تۋرالى ءماجىلىس دەپۋتاتى اسحات ايماعامبەتوۆ مالىمدەدى، دەپ حابارلايدى Dalanews.kz.
ونىڭ ايتۋىنشا، اتا-انالار وزدەرى ۇل بالالارعا ارنالعان ۆپچ ەكپەسىن ەنگىزۋدى سۇراپ، دەپۋتاتتارعا جۇگىنىپ جاتىر. وسىعان بايلانىستى ءماجىلىس دەپۋتاتتارى دەنساۋلىق ساقتاۋ مينيسترلىگىنە ۇسىنىس جولداعان.
اسحات ايماعامبەتوۆتىڭ سوزىنشە، كوپتەگەن ەلدە ۆپچ-عا قارسى ەكپە ۇلدارعا دا، قىزدارعا دا بىردەي سالىنادى.
«سول سەبەپتى ءبىز بۇل ۆاكسينانى ەرىكتى تۇردە قولجەتىمدى ەتۋ قاجەت دەگەن ۇسىنىس ايتتىق. ءقازىر ەكپەنى ءدارىحانادان تابۋ وتە قيىن. سوندىقتان مەملەكەت تاراپىنان بارلىق نيەتتى ازاماتتار ءۇشىن قولجەتىمدىلىكتى قامتاماسىز ەتۋ ماڭىزدى. ءبىز دەنساۋلىق ساقتاۋ مينيسترلىگى بۇل باستامانى قولدايدى دەپ ۇمىتتەنەمىز. سەبەبى ۇل بالالار دا ءقاۋىپ توبىندا. ولاردىڭ دەنساۋلىعى نازاردان تىس قالماۋى كەرەك»، – دەدى دەپۋتات.
ول قازىرگى كەزدە قازاقستاندا قىز بالالارعا ۆپچ-عا قارسى ەكپە تەگىن سالىناتىنىن جانە بۇل – مىڭداعان ادامنىڭ ءومىرىن ساقتاۋعا مۇمكىندىك بەرەتىن ۇلكەن قادام ەكەنىن اتاپ ءوتتى.
«ءبىز ەندى وسى تاجىريبەنى كەڭەيتۋدى ۇسىنامىز. ۆپچ – تەك “ايەلدەرگە ءتان ۆيرۋس” ەمەس. بۇل ۆيرۋس جاتىر موينى قاتەرلى ىسىگىن عانا ەمەس، سونىمەن بىرگە كومەي، اۋىز قۋىسى جانە تىك ىشەك قاتەرلى ىسىگىن دە تۋدىرۋى مۇمكىن، ونىڭ ىشىندە ەرلەردە دە»، – دەپ جازدى ايماعامبەتوۆ ءوزىنىڭ Telegram-ارناسىندا.
بۇعان دەيىن، وتكەن اپتادا، دەنساۋلىق ساقتاۋ ءمينيسترى اقمارال ءالنازاروۆا قازاقستاندا ۆپچ-عا قارسى ەكپە الۋشىلار ءتىزىمى كەڭەيۋى مۇمكىن ەكەنىن ايتقان بولاتىن. ونىڭ مالىمەتىنشە، مينيسترلىك ۇل بالالار مەن 18 جاستان اسقان ازاماتتارعا ەرىكتى تۇردە ەكپە ەگۋ مۇمكىندىگىن قاراستىرىپ جاتىر. ۆاكسيناسيا تەك ەرىكتى تۇردە جۇرگىزىلەدى.
