Osylaisha kommýnister halyqty qaýipti virýstan saqtap, eńbek naryǵyndaǵy ahýaldy durystaýǵa bolatynyn aityp qaldy.
Biraq muny Úkimettiń qoldai qoiýy ekitalai. Tipti táýelsiz sarapshylardyń ózi kommýnisterdiń bastamasyn «jai ǵana halyqtyń kóńilin aýdarý» dep baǵalady.
COVID-tiń kóp jaǵdaida qariialardyń ómirin jalmaitynyn zertteýshiler men dárigerler talai aitqan. Máselen, jyl basynan beri 111 myńǵa jýyq qazaqstandyq qaýipti virýstan qaitys bolsa, sonyń 71 paiyzy, iaǵni 78 myńnan astamy 60 jastan asqandar. Bul derek Májilistegi kommýnisterdi aitarlyqtai alańdatyp otyr.
– Kommýnistik halyq partiiasynyń fraktsiiasy azamattardyń zeinetke shyǵý jasyn qaita qaraýdy usynady. Áielderdiń zeinet jasyn ulǵaitýǵa qatysty 2013 jylǵy reformaǵa qarsy bolǵanbyz. Qazir azamattardyń pikirine súiene otyryp, elimizdegi erkek pen áielderdiń 60 jastan zeinetke shyǵýyn qamtamasyz etý kerek. Kommýnisterdiń bastamasyn biliktiń qoldamaityny belgili. Úkimet túgili, táýelsiz sarapshylardyń ózi muny «upai jinaý úshin jasalǵan, – dedi Aiqyn Qońyrov.
Rasymen de elimizdegi zeinetke shyǵý men ómir súrýdiń ortasha jasy múldem sáikespeitinin mamandar da aityp otyr.
– Ózgeris bolmaidy. Bizde popýlizm degen bar. Depýtattardyń kóbisi osyǵan qumar. Men muny kommýnisterdiń kezekti popýlizmi dep esepteimin. Basqa eshteńe emes. Buryn durys qabyldanbady, endi jańadan bir jańalyq ashqandai bolyp otyr. Ol durys emes, – dedi sarapshy Isatai Qambarov.
Elimizdegi sońǵy reformaǵa sáikes, áielderdiń zeinetke shyǵýyn 58 jastan 63 jasqa deiin ulǵaitý bekitilgen. Erler de zeinet demalysyna 63-te shyǵady. Eńbek ministrligi zeinet jasy qysqarmaitynyn kesip aitty. Soǵan qaraǵanda Májilis depýtatynyń qazaqstandyqtardy 60 jastan zeinetke shyǵarý usynysy aitylǵan jerinde qala beretin syńaily.
