Qasym-Jomart Toqaev bir palataly jańa Parlamentte Prezident kvotasy bolmaitynyn málimdedi, dep habarlaidy Dalanews.kz.
Búgin Memleket basshysy aýyl ákimderiniń dialog-platformasynda sóz sóiledi.
"Men biylǵy Joldaýymda bir palataly Parlament qurý týraly bastama kóterdim. Bul osyǵan deiingi saiasi ózgeristerdiń zańdy jalǵasy deýge bolady. Biz "Kúshti Prezident – yqpaldy Parlament – esep beretin Úkimet" qaǵidatyn ornyqtyra túsemiz, iaǵni elimiz Prezidenttik Respýblika bolyp qala beredi. Jańa bastama qoǵamda qyzý talqylanyp jatyr. Parlamenttiń qurylymyna qatysty kóptegen usynys kelip jatyr. Mysaly, depýtattardyń sany halyq sanyna sáikes, iaǵni proportsionaldy bolýǵa tiis degen oilar aitylyp jatyr. Mundai ustanymmen qaraityn bolsaq, olardyń sany 200 adamǵa jetedi", - dedi Toqaev.
Qazir qos palatada 148 depýtat bar.
"Parlamenttik reforma – eki palatany jai biriktire salý degen sóz emes. Menińshe, depýtat sanyn tym kóbeitýdiń qajeti joq. Kerisinshe, ońtailandyrý kerek, Parlamenttiń jumysyn jetildirý qajet. Mysaly, bir palataly jańa Parlamentte Prezident kvotasy bolmaidy. Barlyq depýtattar birdei tártippen sailanýy qajet. Bul – aldaǵy Parlamenttik reforma aiasynda jasalatyn asa mańyzdy qadam. Muny jaqsy uǵynyp, jurtshylyqqa keńinen túsindirý qajet", - dedi Prezident.
