«Kentaý transformator zaýyty» aktsionerlik qoǵamyna arnaiy kelip, jumysshylarymen kezdesken halyq qalaýlylary el kókeiindegi suraqtarǵa jaýap berip, usynystaryn tyńdady. «Nur Otan» partiiasynyń «Ózgerister joly: Ár azamatqa laiyqty ómir!» atty sailaýaldy baǵdarlamasynyń oryndalý barysy týraly da sóz qozǵaldy.
Kezdesýde «Kentaý trasformator zaýyty» AQ-nyń jumysshylary halyq qalaýlylaryna óndiris oryndarynda, zaýyttarda aýyr jumys isteitin áielderdiń zeinet jasyn tómendetý jóninde usynys-tilekterin bildirdi. Sonymen birge 2006 jyldan beri jer kezeginde turǵan turǵyn óziniń kezekten syzylyp ketkeni týraly aityp, osy máseleni sheship berýdi surady.
«Kentaý trasformator zaýyty» AQ-nyń basqarma tóraǵasy Hairýlla Qojabaev depýtattarǵa «jańa stanoktar men mashinalar alýǵa memleketten jeńildetilgen nesie qarastyrylsa, monoqalalardy damytý baǵdarlamasy arqyly 1 paiyzdyq nesie berilse» degen usynysyn jetkizdi.
Ol máseleni zaýyt jumysshylary da qozǵady. 60 jyldyq tarihy bar zaýyt transformatordyń 400-den astam túrin qurastyrady. 1200-den astam adam jumyspen qamtylǵan zaýyt óndirgen ónimniń 40 paiyzy eksporttalady. Biraq shetelden jáne elimizden kelgen suranysty tolyq oryndaý úshin zaýytqa sapaly stanoktar aýadai qajet. Eger memleket tarapynan qoldaý kórsetilip, másele sheshimin tapsa, óndiris eki esege artady.
Bul usynystardy tyńdaǵan depýtat Syrym Ertaev «Nur Otan» partiiasynyń «Ózgerister joly: Ár azamatqa laiyqty ómir!» atty sailaýaldy baǵdarlamasynda eksporttaýshy kásiporyndardy qoldaý basym baǵytqa ie ekenin málimdedi.
– Sailaýaldy baǵdarlamany oryndaý arqyly aldaǵy 5 jylda elimizdegi belsendi eksporttaýshy kompaniialar sanyn 400-den 1000-ǵa deiin arttyrý kózdelip otyr. Sonymen birge shikizattyq emes eksportty 2,5 ese arttyrý jospary bar. Aýyldardy aralaý barysynda kásipkerler tarapynan osy baǵytta usynystar men ótinishter jii aityldy. Ásirese pandemiia saldarynan jumysy toqtap qalǵan kásiporyndarǵa memlekettik qoldaý asa qajet. Biz kásiporyndardy nesielendirý barysyn jandandyrý úshin Parlamentte tiisti usynystar joldaimyz, – dedi ol.
Al Qainar Begalyuly transformator zaýytynyń Orta Aziiada jetekshi kásiporyn ekenin aita kele osy kezdesýde kóterilgen usynystar nazarǵa alynatynyn jetkizdi. Qazirgi tańda otandyq óndirýshilerdi qoldaý boiynsha zań jobasy ázirlenip jaqanyn aitqan ol jumysshy tobyna ene otyryp, kásiporyndardy nesielendirý boiynsha naqty usynystar beretinin atap ótti.
Jalpy Parlament Májilisiniń depýtattary 7 shildeden beri Túrkistan oblysynyń barlyq derlik aýdan-qalalaryn, eldi mekenderin aralap shyqty. Qoǵamdyq qabyldaýlar ótkizip, «Nur Otan» partiiasynyń sailaýaldy baǵdarlamasyndaǵy Jol kartasynyń oryndalý barysyn saralady. Issapar áli de jalǵasýda. Aldaǵy ýaqytta sailaýaldy baǵdarlamany oryndaý arqyly óńirdegi ózekti máselelerdi sheshý jolynda jumystar jalǵasyn tabady.
