Taıaýda Otyrar aýdanyna arnaıy kelgen QR Parlamenti Májilisiniń depýtaty Ábdimanap Bekturǵanov aýdan turǵyndarymen kezdesip, Elbasy Joldaýynda aıtylǵan basty baǵyttar jaıynda keńinen sóz etti.
Kezdesýge aýdan turǵyndary, ustazdar men Otyrar memlekettik arheologıalyq qoryq-mýzeıiniń qyzmetkerleri, qoǵamdyq uıym jáne BAQ ókilderi qatysty.
Aýdan ákimi Erlan Aıtahanovtyń tóraǵalyǵymen ótken jıynda Májilis depýtaty:
– Jańa baǵdarlamalyq qujat qoǵamnyń ekonomıkalyq, áleýmettik salalaryn qamtyp, qarapaıym turǵyndardyń ál-aýqatyn arttyrýǵa baǵyttalǵan. Elbasy kezekti Joldaýynda «Pedagog mártebesi týraly» zańdy ázirlep, qabyldaý qajettigin aıtty. Bul qujat muǵalimder úshin júktemeni azaıtýǵa, jónsiz tekserister men mindetten tys fýnksıalardan arashalaıtyn qujat bolmaq. Sondaı-aq, Prezıdent joǵary bilim berý isinde oqý oryndarynyń maman daıyndaý sapasyna qatysty talaptar kúsheıtiletinin tilge tıek etti. Elbasynyń belgilep bergen tapsyrmasy arqyly qazyna túsimi artyp, sol boıynsha jalaqy kóbeıedi. Bilim berýdiń sapasy artyp, densaýlyq salasyna basa kóńil bólinetin bolady. Sondaı-aq, baspananyń qoljetimdiligi, eń tómengi jalaqynyń 1,5 esege artýy sekildi birqatar jumystar atqarylmaq. Munyń bári halyqtyń turmys deńgeıi men ál-aýqatynyń artýyna tolyq negiz bolady, – dep Joldaýdyń negizi baǵyttaryna toqtaldy.
Jıyn barysynda jaryssózge shyqqan aýdandyq qoǵamdyq keńesiniń tóraǵasy Myrzahmet Temirbekov pen Otyrar memlekettik arheologıalyq qoryq-mýzeıi dırektorynyń orynbasary Serik Aqylbek halyqtyń turmysyn jaqsartýǵa baǵyttalǵan bıylǵy Joldaýdyń mańyzdylyǵy men naqtylyǵy jaıynda sóz etse, ustaz Farıda Spataeva Elbasynyń ustazdarǵa jasaǵan qamqorlyǵynyń arqasynda elimizdegi bilim salasynyń sapasy halyqaralyq deńgeıge ósetinine senimi mol ekendigin aıtty.
Halyq qalaýlysy jıynǵa qatysýshylardyń kóptegen suraqtaryna jan-jaqty jaýap berdi.
Jıyndy qorytyndylaǵan aýdan basshysy el Prezıdentiniń Qazaqstan halqyna arnaǵan strategıalyq qujattaǵy mindetterdi júzege asyrý úshin otyrarlyqtar bar kúsh-jigerin aıamaıtynyn atap ótip, Joldaýdy nasıhattaý úshin aýdanymyzǵa arnaıy at basyn burǵan Májilis depýtatyna otyrarlyqtar atynan shynaıy alǵysyn jetkizdi.
