Májilis depýtaty Maqsat Tolyqbai qazaq ánshileriniń kontsertterde fonogrammamen óner kórsetýine zań júzinde tyiym salý qajet ekenin málimdedi, dep habarlaidy Dalanews.kz.
Onyń aitýynsha, bul máseleni sheshý úshin depýtattar birneshe ret Mádeniet jáne aqparat ministrligine usynys joldaǵan.
“Qoldanystaǵy zańnama boiynsha ánshi fonogrammamen án aitatyn bolsa, bul týraly kontsertti uiymdastyrýshylar kórermendi habardar etýge mindetti. Alaida bul talap is júzinde oryndalmai keledi. Sol sebepti biz zańǵa fonogrammamen án aitýǵa tolyq tyiym salatyn túzetýler engizýdi usyndyq. Biraq ministrlik ony qoldap otyrǵan joq”, - deidi ol.
Depýtattyń sózinshe, atalǵan máselege bailanysty túrli syltaý aitylǵan.
“Birinshiden, óńirlerdegi kontsert zaldarynyń tehnikalyq jabdyqtary 70%-ǵa tozǵany aityldy. Osyǵan bailanysty biz zań talabyn jeńildetip: «eger kontsert ótetin oryn qajetti tehnikalyq quraldarmen tolyq qamtamasyz etilse, fonogrammaǵa tyiym salynsyn» degen norma usyndyq. Alaida bul da qoldaý tappady.
Al ekinshiden, dybys rejisserleriniń jetispeitinin aitty. Olarǵa suranys bolmaǵan soń, árine, jetispeidi. Biz normany taǵy da jeńildetip: "eger oryn jetkilikti túrde jabdyqtalmaǵan jáne kontsertterge beiimdelmegen bolsa, osy týraly kórermendi habardar ete otyryp, fonogrammaǵa ruqsat etiledi" dedik. Sizder buǵan da qarsysyzdar, bizdiń usynysymyz ekinshi oqylymǵa deiin qoldaý taba ma?”, - dep kúiindi ol.
Óz kezeginde Mádeniet jáne aqparat vitse-ministri Aibek Sydyqov bul másele 11 naýryzda ótetin keńeitilgen jiynda qarastyrylatynyn atap ótti.
