Májilis depýtaty Sergei Ponomarev eńbek jáne halyqty áleýmettik qorǵaý ministri Asqarbek Ertaevqa depýtattyq saýal joldap, Qazaqstandaǵy kásibi merekeler júiesin qaita qaraýdy usyndy, dep habarlaidy dalanews.kz.
Onyń aitýynsha, búginde elde 74 kásibi mereke bar. Alaida olardyń shamamen 20 paiyzy naqty mamandyqtarǵa emes, jekelegen memlekettik organdarǵa arnalǵan.
Depýtat mundai jaǵdai kásibi merekelerdiń bastapqy mánin álsiretip otyrǵanyn atap ótti. Onyń pikirinshe, mundai kúnder belgili bir vedomstvonyń qurylǵan kúnin emes, eńbek adamdarynyń qoǵam men ekonomikaǵa qosqan úlesin dáripteýi kerek.
Sergei Ponomarev merekeler jyl ishinde birkelki bólinbegenine de nazar aýdardy. Mysaly, qazanda birden 15 kásibi mereke atalyp ótedi.
Sondai-aq, ol bilim berý salasynda birneshe mereke qatar belgilengenin mysalǵa keltirdi. Joǵary bilim berý qyzmetkerleri kúni, tehnikalyq jáne kásiptik, orta bilimnen keiingi bilim berý qyzmetkerleri kúni jáne muǵalimder kúni bar.
Depýtattyń pikirinshe, halyq arasynda keńinen tanylǵan muǵalimder kúni - negizgi mereke, al oǵan jaqyn baǵyttar boiynsha jeke kásibi merekeler bolýy onyń mańyzyn tómendetedi.
Osyǵan bailanysty depýtat Úkimetke birneshe usynys jasady. Kásibi merekelerdi belgileýdiń biryńǵai ádistemesin ázirleý, qoldanystaǵy merekeler tizimin qaita qarap, qaitalanatyn jáne keibir merekelerdi biriktirý, sondai-aq, kásibi merekeler tizimin ministr buiryǵymen emes, Úkimet qaýlysymen bekitý usynyldy.
Sonymen qatar, bul tizimdi eki jyl saiyn jańartyp otyrý qajet ekeni aityldy.
