Depýtat Marat Bashımov Májilistiń plenarlyq otyrysynda Joǵary aýdıtorlyq palata (JAP) júrgizgen tekserýlerdiń nátıjelerin qupıa qylý absýrd ekenin basa atap ótti. Halyq qalaýlysy Joǵary aýdıtorlyq palatanyń tóraǵasy Álıhan Smaıylovtyń atyna joldaǵan saýalynda Qazaqstan zańdary barlyq qarjylaı tekserýlerdiń ashyqtyǵyn talap etetinin eske saldy, dep habarlaıdy Dalanews.kz.
"Qoǵam tarapynan suraqtar týyndaýda. Bizde qabyldanǵan mańyzdy aýdıtorlyq tekserýler bar. Biraq onyń qorytyndylary týraly ýaqtyly habar berile bermeıdi. Mysaly, JAP saıtyn alalyq, onda 2022 jyldan beri júrgizilgen tekserýlerdiń nátıjeleri tappaısyz, áli joq. Sońǵy jarıalanǵan aýdıtorlyq qorytyndy 2022 jyldyń 11 tamyzy degen datamen tur. Aýyl sharýashylyǵy, MÁMS boıynsha tekserýler júrgizildi emes pe, al olardyń qorytyndysy qaıda? Palata múshesi Nurlan Nurjanov aýdıtorlyq tekserýler boıynsha aqparat "qyzmettik tártip qujattary "(QBP) sanatyna jatqyzylýy múmkin qandaı da bir krıterııler baryn aıtqan edi", - deıdi depýtat.
Alaıda, ol 2024 jyldyń jeltoqsanynda BAQ-ta "Nazarbaev Ýnıversıtetine" qatysty 73 mlrd teńgeniń tıimsiz jumsalǵany týraly aqparat paıda bolǵanyn, al sol aýdıt nátıjeleri týraly áli tolyq aqparat jarıalanbaǵanyn da atap ótti.
"Ýnıversıtet basshylyǵy tekserý nátıjelerine qatysty el aldyna shyǵyp, ashyqtan ashyq túsinikteme berdi. Endeshe bul rette tolyq aqparatqa degen qoljetimdilikti shekteý ne sebepten týýda? Aýdıtorlardyń logıkasy qyzyq: aqsha memlekettiki, ıaǵnı halyqtiki, qyzmet áleýmettik turǵydan mańyzdy, biraq ol qandaı da bir jaǵdaıda qupıa bolyp tabylady eken. Qymbatty áriptester, bilim berý, medısına jáne áleýmettik salalardyń máseleleri qupıalylyqqa jatpaýy tıis, ol bir áskerı nemese quqyq qorǵaý salasynyń búdjeti emes qoı", - dedi Marat Bashımov.
Osyǵan baılanysty depýtat JAP-tan 2022-2024 jyldary júrgizilgen tekserý nátıjelerin jarıalaýdy talap etti.
Aıta ketsek, Joǵary aýdıtorlyq palatanyń tóraǵasy Álıhan Smaıylov ótken jyly shamamen 11 trln teńgeni qamtıtyn 214 nysanda 27 aýdıtorlyq is-shara ótkizilgenin habarlady. Nátıjesinde 862 mlrd teńge somasyna buzýshylyqtar anyqtaldy, tekserý qorytyndysy boıynsha búdjetke 135 mlrd teńge qaıtaryldy.
