دەپۋتات مارات باشيموۆ ءماجىلىستىڭ پلەنارلىق وتىرىسىندا جوعارى اۋديتورلىق پالاتا (جاپ) جۇرگىزگەن تەكسەرۋلەردىڭ ناتيجەلەرىن قۇپيا قىلۋ ابسۋرد ەكەنىن باسا اتاپ ءوتتى. حالىق قالاۋلىسى جوعارى اۋديتورلىق پالاتانىڭ ءتوراعاسى ءاليحان سمايىلوۆتىڭ اتىنا جولداعان ساۋالىندا قازاقستان زاڭدارى بارلىق قارجىلاي تەكسەرۋلەردىڭ اشىقتىعىن تالاپ ەتەتىنىن ەسكە سالدى، دەپ حابارلايدى Dalanews.kz.
"قوعام تاراپىنان سۇراقتار تۋىنداۋدا. بىزدە قابىلدانعان ماڭىزدى اۋديتورلىق تەكسەرۋلەر بار. ءبىراق ونىڭ قورىتىندىلارى تۋرالى ۋاقتىلى حابار بەرىلە بەرمەيدى. مىسالى، جاپ سايتىن الالىق، وندا 2022 جىلدان بەرى جۇرگىزىلگەن تەكسەرۋلەردىڭ ناتيجەلەرى تاپپايسىز، ءالى جوق. سوڭعى جاريالانعان اۋديتورلىق قورىتىندى 2022 جىلدىڭ 11 تامىزى دەگەن داتامەن تۇر. اۋىل شارۋاشىلىعى، ءمامس بويىنشا تەكسەرۋلەر جۇرگىزىلدى ەمەس پە، ال ولاردىڭ قورىتىندىسى قايدا؟ پالاتا مۇشەسى نۇرلان نۇرجانوۆ اۋديتورلىق تەكسەرۋلەر بويىنشا اقپارات "قىزمەتتىك ءتارتىپ قۇجاتتارى "(قبپ) ساناتىنا جاتقىزىلۋى مۇمكىن قانداي دا ءبىر كريتەرييلەر بارىن ايتقان ەدى"، - دەيدى دەپۋتات.
الايدا، ول 2024 جىلدىڭ جەلتوقسانىندا باق-تا "نازاربايەۆ ۋنيۆەرسيتەتىنە" قاتىستى 73 ملرد تەڭگەنىڭ ءتيىمسىز جۇمسالعانى تۋرالى اقپارات پايدا بولعانىن، ال سول اۋديت ناتيجەلەرى تۋرالى ءالى تولىق اقپارات جاريالانباعانىن دا اتاپ ءوتتى.
"ۋنيۆەرسيتەت باسشىلىعى تەكسەرۋ ناتيجەلەرىنە قاتىستى ەل الدىنا شىعىپ، اشىقتان اشىق تۇسىنىكتەمە بەردى. ەندەشە بۇل رەتتە تولىق اقپاراتقا دەگەن قولجەتىمدىلىكتى شەكتەۋ نە سەبەپتەن تۋۋدا؟ اۋديتورلاردىڭ لوگيكاسى قىزىق: اقشا مەملەكەتتىكى، ياعني حالىقتىكى، قىزمەت الەۋمەتتىك تۇرعىدان ماڭىزدى، ءبىراق ول قانداي دا ءبىر جاعدايدا قۇپيا بولىپ تابىلادى ەكەن. قىمباتتى ارىپتەستەر، ءبىلىم بەرۋ، مەديسينا جانە الەۋمەتتىك سالالاردىڭ ماسەلەلەرى قۇپيالىلىققا جاتپاۋى ءتيىس، ول ءبىر اسكەري نەمەسە قۇقىق قورعاۋ سالاسىنىڭ بيۋدجەتى ەمەس قوي"، - دەدى مارات باشيموۆ.
وسىعان بايلانىستى دەپۋتات جاپ-تان 2022-2024 جىلدارى جۇرگىزىلگەن تەكسەرۋ ناتيجەلەرىن جاريالاۋدى تالاپ ەتتى.
ايتا كەتسەك، جوعارى اۋديتورلىق پالاتانىڭ ءتوراعاسى ءاليحان سمايىلوۆ وتكەن جىلى شامامەن 11 ترلن تەڭگەنى قامتيتىن 214 نىساندا 27 اۋديتورلىق ءىس-شارا وتكىزىلگەنىن حابارلادى. ناتيجەسىندە 862 ملرد تەڭگە سوماسىنا بۇزۋشىلىقتار انىقتالدى، تەكسەرۋ قورىتىندىسى بويىنشا بيۋدجەتكە 135 ملرد تەڭگە قايتارىلدى.
