Májilis depýtaty Murat Ábenov úkimetti sheteldik múddelerdi qorǵap otyr dep synǵa aldy, dep habarlaidy Dalanews.kz.
Májilismenniń aitýynsha, qazirgi úkimet shikizat oligarhtaryn jáne sheteldik kompaniialardyń múddesin qoldap otyr. Ol Qazaqstan temir joly (QTJ) úkimettiń tapsyrmasymen iri taý-ken metallýrgiia kompaniialaryna jeńildikter jasap jatqanyn eske saldy.
"Kómir, rýda men metalldar Resei men Qytaiǵa tómen tarifpen jóneltiledi. Bul sheteldik zaýyttarǵa tiimdi. Al qazaqstandyq kásiporyndar bul shikizatty qymbatqa satyp alýǵa májbúr nemese múldem ala almai otyr", – dedi depýtat.
Ol Qaraǵandy metallýrgiia kombinaty ishki naryqty qamtamasyz etpei, ónimin túgel syrtqa shyǵaratynyn aityp, mysal retinde Qyzylordadaǵy stadionnyń qurylysynda Qytai metally qoldanylyp jatqanyn alǵa tartty.
Ábenovtiń pikirinshe, mundai jeńildikter 30 jyl buryn, burynǵy prezident tusynda, eski júiede berilgen. Biraq jańa úkimettiń keibir sheneýnikteri sol artyqshylyqtardy qorǵaýdy jalǵastyryp keledi. Bul jaǵdai shaǵyn jáne orta bizneske keri áser etip otyr. QTJ shyǵyndy óteý úshin basqa tutynýshylarǵa tarifti kóterýge májbúr.
"Bul jeńildikter burynǵy prezidenttiń dos-jarandaryna, «eski Qazaqstan» kezinde berilgen. Alaida, qazirgi úkimette áli de sol oligarhtardyń múddesin qorǵap júrgen sheneýnikter bar siiaqty", – dedi ol.
Depýtat shikizatty Qazaqstanda óńdep, jumys oryndaryn ashyp, daiyn ónimdi eksporttaýdy usyndy. Ol bul máseleni premer-ministr Oljas Bektenovke de jetkizgenin aitty.
"Men oǵan senemin. Tártip ornatýǵa tyrysyp júrgenin kórip otyrmyn. Múmkin bul máselege áli qoly jetpegen shyǵar. Biraq ol óz ainalasyn muqiiat zerdeleýi tiis. Bálkim, janynda sheteldik kompaniialardyń paidasyn kózdep, shikizat eksportyna jeńildik berýdi túrli syltaýmen qorǵap júrgen jasyryn lobbister otyrǵan shyǵar. Múmkin olardyń múddesi tek materialdyq paida emes shyǵar", – dedi Ábenov.
Osydan keiin depýtat bul máseleni parlamentte kóterip, tekseris bastamaq.
