Mańǵystaý oblysynda mektep oqýshylarynyń ýlaný oqiǵalaryna bailanysty Densaýlyq saqtaý ministrligi alańdaýshylyq bildirip, bilim berý uiymdaryndaǵy tamaqtaný júiesine túbegeili ózgeris engiziletinin málimdedi, dep habarlaidy Dalanews.kz.
Úkimet otyrysynda sóz sóilegen Densaýlyq saqtaý ministri Aqmaral Álnazarova:
"Mańǵystaý oblysynda oryn alǵan oqýshylardyń ýlanýy – balalarǵa arnalǵan mekemelerdegi tamaqtaný júiesin túbegeili qaita qaraý qajettigin kórsetti. Osyǵan orai, ministrlik memlekettik baqylaýdy kúsheitetin jańa tásilderdi ázirlep otyr", – dedi.
Usynylyp otyrǵan negizgi ózgerister:
• Balalar baratyn mekemelerge erekshe mártebe beriledi;
• Tekserý týraly aldyn ala habarlama taratylmaidy;
• Sanitarlyq talaptardy baqylaý úshin monitoringtik saparlar engiziledi.
2025 jyldyń 1 qyrkúieginen bastap bilim berý mekemelerinde durys tamaqtanýǵa arnalǵan jańa ulttyq standart kúshine enedi. Bul standart semizdik, qant diabeti, júrek-qan tamyrlary aýrýlarynyń aldyn alýǵa baǵyttalady.
Jańa talaptarǵa sáikes:
• Qant mólsheri – 3,6 ese,
• Tuz mólsheri – 5 ese azaitylady.
Bul kórsetkishter kelesidei nátijege qol jetkizýdi kózdeidi:
• Balalardaǵy semizdikti 15%-ǵa,
• Qant diabetin 20%-ǵa,
• Arteriialyq gipertenziiany 18%-ǵa tómendetý.
Sondai-aq ashanasy joq shaǵyn mektepter úshin jeke mázir usynylady. Sonymen qatar alǵash ret "Jeýge jaramsyzdyq indeksi" atty jańa júie engiziledi. Ol balalardyń qanshalyqty tamaq ishkenin jáne taǵam qaldyǵynyń deńgeiin baǵalaýǵa múmkindik beredi.
Qazirgi ýaqytta bul jańa standartty túsindirý maqsatynda óńirlik basqarmalar, mektep ákimshiligi men jetkizýshilerdiń qatysýymen oqytý seminarlary ótkizilýde. Standarttar mektepter men balabaqshalarǵa birdei qoldanylady.
